MIRI: Penyampau baya ke majak mayuh ba sitak Parlimen Sibuti balat ngirauka ati mensia mayuh ba endur nya lalu ngujungka sida begunaka buah runding ari ejensi perintah ke besangkut paut.
Kaban Parlimen Sibuti, Ahmad Lai Bujang madah penyampau jelu nya diatu majak mayuh lalu dipelabaka mega sida ngiga mensia nyadika utai pakai.
“Ketegal utai pakai bukai ke majak kurang baka ikan enggau undang ba sungai ngujungka baya ke majak mayuh diatu nguji ngiga mensia nyadi pemakai,” ku iya madah ngagai Utusan Borneo apin lama ke udah.
Ahmad Lai madah, isu baya nya udah dibai ngagai ejensi ke besangkut paut tang nyentuk ke sehari tu agi nadai sebarang pengawa ke udah digaga raban sida nya.
“Aku enggau Kaban Kunsil Nengeri (ADUN) Bekenu, Rosey Yunus udah suah ngemansutka isu baya mangah tu tang nadai sebarang pengawa ke udah digaga sida nyentuk ke sehari tu,” ku iya.
Iya madah, Sungai Sibuti, Sungai Niah, Sungai Bakam enggau sungai-sungai mit ke ngerimbai nya udah diuan baya magang lalu utai nya udah kala dipeda rayat ditu empu.
“Orang berikan ke beridup ari sungai nyadi pun penatai pemisi sida diatu nyau berasai takut ninga rita penatai baya nya, utai tu nyau nanggul penatai pemisi sida ninting hari,”ku iya.
Berindik ari nya, Ahmad Lai madah, raban orang ke besangkut paut patut berunding sereta lengkas mutarka penanggul baya ke majak mayuh.
“Kami mega minta awakka rayat diberi lisen nangkap baya lalu dianjung ngagai kandang penupi baya nyadika upah sida nangkap baya nya,”ku iya.
Iya madah, isu kena serang baya ba Sibuti ukai pekara baru tang udah suah nyadi lalu patut diperundingka ejensi ke besangkut paut.
Dalam ripot surat kabar ensana, seiku baya kira 10 kaki pemanjai mujur ditangkap sereta dibunuh orang kampung Raan di Bakam.
Jelu mangah nya digiga serera ditangkap laban ngirauka ati mensia mayuh pengudah nyadi kes baya nyerang tiga iku nembiak lelaki kena Hari Tiga minggu ke udah.