KUCHING: Dewan Bandaraya Kuching Utara (DBKU) ngeluarka belanja lebih ari RM200,000 dikena nganti besi penutup parit, pagar besi sereta perengkaguna mensia mayuh ti dirusakka orang.
Datuk Bandar DBKU, Datuk Abang Abdul Wahap Abang Julai madah tebal agi perengkaguna mensia mayuh ti diganti nya di gaga ari besi keluli ti chukup berega enti dijual.
“Vandalisme sereta penchuri perengkaguna mensia mayuh udah nempa mayuh penanggul berindik ari ulah nadai jai nya kami (DBKU) ngeluarka belanja lebih ari RM200,000 taun nyin kemari, dikena nganti baru.
“Taja pia, nitihka ripot DBKU naka Jun taun tu penyampau kes nya bisi nurun lalu aku ngarapka ulih manggai tikas ‘Sifar Vandalisme’ jemah ila,” ku iya madahka ngagai The Borneo Post, kemari.
Iya arap endar ati mensia mayuh kemaya hari tu mereti sereta chakah agi malutka diri dalam program komuniti ti diatur kena ngiri penemu ba pengawa nyaga sereta sayauka reta ti diempu semua.
Kelimpah ari nya, DBKU mega melanjaka duit dikena nganti sereta ngemanahka baru lampu di kandang Taman Reservoir enggau Taman Muzium, papan nama sereta ke bukai di kandang endur ke di pegai DBKU.
“DBKU ti nyadi opis ke bekuasa ditu megai tanggungpengawa nentuka semua nya manah lalu ulih dikena raban bansa lalu berebak enggau tu mega kami enggau naka ulih nukar perengkaguna mensia mayuh ti udah dirusak nya.
“Dikena nyeliahka ari dichuri, DBKU deka nganti penutup parit ngena kereban ti enda berega ngambika orang nadai ati agi deka enchuri nya,” ku iya.
Iya madahka, kandang menau di Samariang enggau Genturung Pendiau Gita suah endur penusag vandalisme nya nyadi.