Anda di sini

Muzium Warisan deka diisi kereban, Januari 2015

Advertisement

SRI AMAN: Pengawa ngisi kereban pemandang dalam Muzium Warisan, Sri Aman deka berengkah dipejalaika pun bulan Januari taun baru.

Direktor Opis Muzium Sarawak, Ipoi Datan madah, pengawa ngisi kereban pemandang nya bedau dipejalaika diatu laban agi meri awak ngemanahka Kubu Alice ngambika nyadi Muzium Warisan ti disadang tembu digaga bulan November tu.

“Muzium Warisan nya deka diisi enggau kereban pemandang pasal sejarah kubu-kubu lama ke bisi di nengeri Sarawak kelebih agi Kubu Alice di Sri Aman tu,” pia ku iya.

Iya bejaku munyi tu lebuh ti dikerandau pemberita maya Menteri Muda Pemansang Menua Pesisir enggau Pengawa Berumah, Datuk Francis Harden Hollis ke ngabas Projek Ngemanahka Kubu Alice ngambika nyadi Muzium Warisan, ditu ensanus.

Berebak enggau nya, projek ngemanahka Kubu Alice, Sri Aman ngambika nyadi Muzium Warisan udah 70 peratus tembu digaga, ku Ipoi.

“Perintah udah ngungkupka belanja RM5 juta kena ngemujurka projek nya,” ku iya.

Bela bisi enggau maya nya, Sapit Residen Sri Aman (Pemansang), Philip Peter Salam, Sapit Injiner JKR Sri Aman, Mohd Noor Ismail, SAO ari Opis Pelilih Mit Sri Aman, Henry Krang, bala pemesai perintah enggau bala ketuai raban bansa ke bisi ditu.

Projek ngemanahka Kubu Alice nyadi Muzium Warisan di Sri Aman tu udah dipejalaika Mike Boon, iya nya seiku artikek ari Kompeni JFN Sendirian Berhad.

Advertisement