KUCHING: Tiga parti komponen BN baka PRS, SPDP enggau SUPP sepenemu enggau “merger of the minds” laban penuduk ti diungkupka ngagai sida ngelama tu deka diambi pengari rayat ari Teras.
Pampang Nembiak PRS lebuh ti mansutka penerang ngagai The Borneo Post ditu kemari madah, nadai kebuah PBB deka malutka diri ba pekara tu laban 35 iti penuduk ke diempu sida nadai ditegu.
“Presiden kami Tan Sri Datuk Amar Dr James Jemut Masing keterubah endar udah nguna awak pengerami Ngiling Tikai kena ngempuruka tiga buah parti komponen BN ke bepenanggul laban Teras sereta mandangka diri begulai ba mua mensia mayuh kelai sida ulih berakup.
“Ukai reti PBB ditinggalka ari tuju nya tang penuduk sida endang nadai kena tegu. Ambika rikod, sekeda menteri enggau pengari rayat PBB bisi dikangauka tang penatai sida ukai ba maya ke patut,” bacha penerang nya.
Taja pia, Kaban Kaunsil Besai PBB Datuk Abdul Karim Rahman Hamzah bisi mansutka penerang sereta betanya nama utai ti deka dikereja sida nengah aum “merger of minds”.
Ku Abdul Karim lebuh ti madah ngagai The Borneo Post kena Hari Satu tu tadi, iya enda nemu kebuah parti iya enda dibai baumka “merger of the minds” baka ti dibantaika presiden ketetiga parti nya.
“Utai ti deka ditemu aku iya nya nama kebuah PBB enda dibai berakup. Engka sekeda ketuai ngumbai PBB enda engkeman agi tauka enda patut enggau sida berakup.
“Aku agi saru runding pasal “merger of minds” baka ti dibantai ketetiga ketuai parti komponen BN nya. Manah agi sida nerangka reti “merger of mind” nya, pia ku Abdul Karim nengah penerang ti dikeluarka ba The Borneo Post kena Hari Satu tu tadi.
Abdul Karim mantaika pekara ngenang aum ke diatur entara Tan Sri Peter Chin (SUPP presiden), Datuk Seri Tiong King Sing (SPDP pemangku presiden) enggau Masing (PRS presiden) ba pengerami Gawai Dayak ke diatur ba rumah Masing, kena lemai Hari Enam nyin tadi.
Nambahka nya, Sapit Pampang Nembiak PRS Kaunsilor Sempurai Petrus Ngelai ba penerang ti dipansutka iya minta Abdul Karim anang kelalu irau ati pasal “merger of the minds” laban nya deka dikena ketetiga parti komponen ngenegapka BN ngambika sida ulih ngetanka penuduk ti diungkupka BN ba pengawa bepilih ti deka datai tu ila.
“Kami enda ninggkalka kaban diri ngetanka BN betapi enggau penyakal. Nya alai sesapa ti ngasaika diri ditinggal, nya semina asai ati sida empu aja enggau berita selebubu ngapa. Reti nya semua komponen parti BN mengkang beguna ngambika ulih ngetanka penuduk sida ari labuh ngagai jari penyakal,” ku Sempurai.
Penerang ari Nembiak PRS nya dikeluarka kena nimbal jaku bantah Abdul Karim seraya ngetanka Masing enggau president SUPP sereta SPDP ti bisi dipeda ayan ba rumah Masing ke begempung deka ngetanka penuduk ti diungkupka BN ari diambi Teras pengudah 10 iku pengari rayat ari SUPP, SPDP enggau Sarawak Workers Party (SWP) ningkilka diri ari parti nya sereta masuk Teras kena 15 May tu tadi.
Kena 16 May, 10 iku pengari rayat nya betemu enggau chairman BN nengeri ke mega Kepala Menteri Tan Sri Datuk Amar Adenan Satem madahka diri talukka BN, taja pan udah ningkilka diri ari parti komponen BN nya.
Masing mega madahka PRS udah diungkupka BN semilan penuduk, SUPP (19) lalu SPDP (8); ti ngujungka tiga buah parti nya deka bepilih ba 36 iti penuduk ba Pengawa Bepilih Nengeri ti deka datai tu ila.
PRS bisi penanggul ba penuduk sida di sitak Pelagus, SPDP bisi penanggul ba penuduk sida di sitak Tasik Biru, Pakan, Batu Danau, Marudi enggau Bekenu lalu SUPP bisi penanggul ba penuduk sida di sitak Opar, Bengoh, Engkilili enggau Bawang Assan.
Teras diatu ngarapka 10 iti penuduk Kunsil Nengeri, PRS (8), SUPP (2) lalu SPDP nadai sebarang penuduk. Penuduk Kunsil Nengeri bukai diempu parti penyakal baka DAP (11), PKR (3) lalu SWP (1).
Taja pia, Teras berasai temegah endar ati laban ke ngembuan dua iku menteri penuh sereta empat iku Menteri Muda dalam kabinet nengeri taja pan sida mengkang ari luar BN.