Anda di sini

Abdullah Saidol berami ngiling bidai ba rumah panjai Iban

Advertisement

Dikarang Judan Bungap //

JAKU TANGKAN: Abdullah maya meri jaku lalau rambau ngabang ngagai Rumah Peter.

BINTANGOR: Tebal agi genturung pendiau enggau rumah panjai di baruh pegai Kunsil Nengeri (DUN) Semop semina ulih dilawa ngena perau aja tang nya enda nekul ADUN sitak tu, Abdullah Saidol, datai ngabang ngulu pengerami Ngiling Bidai raban bansa Iban ari baruh pegai iya ninting taun.

Taun tu, Abdullah disempulang bini iya Nora Ashikin Ibrahim enggau anak indu seduai Damia Nur ngabang berengkah ari minggu dulu suba ngagai 10 buah rumah panjai ti nyengkaum lebih 40 rumah panjai ke ngembuan urung 700 pintu bilik.

Penatai sida tiga menyanak endang disambut bala rumah panjai enggau basa ti chukup kelimpah ari berasai gaga ati meda pengari sida ke enda kala enda datai ngabang ngagai rumah panjai maya Hari Gawai enggau pengerami Ngiling Bidai.

Kelimpah ari nya, penatai Abdullah mega serak tu disempulang Sapit Residen (Program Pemansang) Sarikei Badjuri Bidin, Sapit Chairman Parti Pesaka Bumiputera Bersatu (PBB) Pampang Meradong Morsili Bakar, Sapit Chairman PBB Pampang Semop Kaunsilor Tuai Rumah Nicholas Abu Seman, Ketuai Raban Nembiak PBB Pampang Meradong Kaunsilor Helmi Morsili, Kaunsilor Nick Penghulu Augustine Pau sereta bala ke bukai.

PENEMBU GAWAI: Abdullah (tengah) disempulang TR Anggi (dua kiba) enggau bala tuai rumah bukai ngiling tikai kelai tembu gawai.

Dikena ngepunka pengawa ngabang, Abdullah enggau raban iya ngabang ngagai Rumah Ben Kuling enggau Rumah Bangga Takin kena 14 Jun tu tadi lalu ditangkanka hari seiti ngagai Rumah Juing Depa, Rumah Wun Ering enggau Rumah Suku Liban.

Ujung minggu tu tadi belabuh ari 21 Jun, iya ngabang ngagai Rumah Seli Judi, Rumah Peter Minggat enggau Rumah Anggi Enggol.

Hari seiti iya ngabang ngagai Rumah Gauning Lagau sebedau nyempulang Speaker Kunsil Nengeri Datuk Amar Mohamad Asfia Awang Nassar ngulu pengerami ke sebaka ba Rumah Usop Bengkok, Sungai Sian, Bintangor.

Ba tiap bengkah rumah panjai ke ditiki iya, Abdullah mantaika penyiru ngagai rayat ba rumah panjai ke tebal agi empai silik ngasaika pemansang ke ditapi rayat ba kandang mengeri.

Berindik ari nya, iya endang ari suba kenyau ke dipilih nyadi pengari rayat menua nya besemaya naka alah dekaka rayat ari baruh pegai iya bela ngasaika projek pemansang kelebih agi baka jalai alun, karan enggau ai paip beresi.

Pengeransing iya deka mai pemansang ba menua nya disempulang enggau jaku tangkan pemesai nengeri tu ti minta semua pengari rayat anang enda ngemeratka pengidup rayat ba kandang menua pesisir kelebih agi bansa Iban ke nguan rumah panjai, laban pemujur Barisan Nasional (BN) baka ke dipeda sehari tu endang datai ari sukung rayat menua pesisir.

Lebuh ke ngabang ngagai tiap buah rumah panjai nya, sida menyanak mega enda sanggu ati begulai enggau rayat enda milih tikas umur.

Penatai sida ke ngabang serak tu mega bisi mai raban AS Band ke datai merindang rayat rumah panjai ke ditiki iya.

Kelimpah ari nya, seduai melaki bini bisi nyuaka pemeri ngagai nembiak mit beserimbai enggau Hari Gawai.

Bala tuai besai bela bisi ampit nerima perais ari pengawa nyabut tikit benasit.

ADAT: Pengawa miring ke bela digulu Abdullah dulu agi diatur sebedau nandu pengawa bukai.

Advertisement