Opis ke bekaul patut ngembuan penyinu sereta mantu penusah ti ditapi seduai menyadi
KASIH AMAT: Rinda (kanan) nyuaka bantu pemakai ngagai Unal.
SARIKEI: Pemerinsa pengidup ke ditapi dua iku diri menyadi ke diau dalam kampung ba Sungai Empit, udah matak penyinu ati Sapit Kaban Parlimen Pakan, Rinda Alexander ngabas endur nya ujung minggu seiti nyin tadi.
Dua iku menyadi nya ke sama bela beumur urung 40 taun, sama bela diau ba langkau kediri empu ti urung 500 meter penyauh ari pangan diri, pia ku Rinda ba penerang ke diemel iya ngagai The Borneo Post enggau Utusan Borneo kemari.
Menyadi ke tuai agi, Unal Umpur diau ba sebuah langkau mit ke digaga ari buluh ti beatapka daun apung sereta belantaika papan lama, urung 100 meter ari Rumah Lidam, iya nya rumah panjai ke pemadu semak enggau seduai, pia ku Rinda.
Rumah menyadi Unal ke biak agi ari iya, Esik Umpur ba seberai Sungai Kedup urung 600 meter ari Rumah Lidam, ku Rinda.
Munyi ke dipadah ari orang ke diau semak enggau dua iku menyadi nya, seduai ngidup kediri udah bekau apai indai seduai parai urung 30 taun ke udah, ku Rinda seraya madahka seduai agi biak maya nya.
Seduai beridup enggau pemakai ari kampung, nangkap ikan ba sungai lalu enti bisi mimpi manah nya baru seduai bisi makai pemakai ke nyamai agi diberi peranak rumah panjai ke semak enggau pendiau seduai, ku iya.
“Esik ke timpang pendiau manah agi nasit laban bisi nerima bantu RM300 ari Opis Pengintu Pengelantang Pendiau, taja pia aku enda nemu kebuah Unal enda diberi bantu nya taja pan iya bisi penanggul ninga,” ku iya.
Rinda arapka opis ke bekaul bisi penyinu meda seduai menyadi nya sereta meri sebarang bantu ngagai orang ke dalam kategori tu.
Seduai menyadi nadai kala dibantu, tambah mega seduai enda nemu reti utai ke dikumbai minta bantu ari Opis Pengintu Pengelantang Pendiau laban ke diau jauh di menua pesisir.
Indah enda minta bantu meli perengka idup ke beguna ari peranak rumah panjai ke semak enggau seduai nya seduai jarang, pia ku Rinda.