Dikarang Jacqueline David //
Peminta TERAS nya deka diputus enggau siru seraya ngemeratka pemereti, kaul parti komponen
KUCHING: Peminta Parti Tenaga Rakyat Sarawak (TERAS) masuk nyadi kaban Barisan Nasional (BN) deka diputus enggau siru seraya ngemeratka pemereti sereta kaul semua kaban parti dalam komponen BN.
Sapit Menteri Besai Tan Sri Muhyiddin Yassin madah sebarang ‘formula’ deka dikena enti nya tau nyaup ngenegapka Barisan Nasional (BN).
“Nya alai, bakani ku gaya ‘formula’ ke deka dikena, tauka bakani iya deka diputus nyangka ngambi timpuh ke lama mimit. Menteri Besai enggau Kepala Menteri pan udah nemu pasal pekara tu…Beri kami timpuh beratika pekara tu ngena jalai alus dulu.
“Aku pechaya pekara tu deka diputar nengah penegap dalam BN. Kami nyerahka pemutus tu nitihka pengelandik sereta penemu Kepala Menteri Sarawak ti nyadi chairman BN Menua Sarawak.
“Taja pia, BN pan beratika gaya lanskap politik menua tu dulu lalu beratika gaya ke ‘sensitif’ diatu, tang ke batang, asal pekara tu enda ngachau penuduk BN di menua tu,” ku Muhyiddin.
Iya madah munyi nya lebuh dikerandau maya aum media beserimbai enggau penemuai iya ngagai Kuching kemari, ti sama digulu tuai pemesai BN menua di Hotel Pullman ditu.
Kena 15 Mei tu tadi, seraban pemesai ex-kaban SPDP (Sarawak Progressive Demokratic Party) diuluka ex-presiden parti nya, Tan Sri William Mawan ningkilka diri ari parti, lalu disempulang ex-chairman Parti Sa’ati Rayat Sarawak (SUPP) pampang Sibu enggau seiku ADUN Pelagus ex-SWP (Sarawak Workers Party) George Lagong.
Berindik ari nya, TERAS bisi madahka diri deka minta nyadi kaban BN, lalu pemutus nyadi kaban BN begunaka 13 konsensus komponen BN bukai di serata menua ngemendarka pekara nya.
TERAS nyengkaum kaban bukai, iya nya Datuk Peter Nansian Ngusie (Tasik Biru), Datuk Sylvester Entri Muran (Marudi, Datuk Dr Jerip Susil (Bengoh), Rosey Yunus (Bekenu), Dr Johnical Rayong (Engkilili), Paulus Palu Gumbang (Batu Danau), Ranum Mina (Opar) enggau George Lagong (Pelagus).
Enti sema TERAS diterima nyadi komponen BN, parti nya deka nyadi parti kedua pengabis besai (udah PBB) di Sarawak.