KUCHING: Konsep Program Sekolah Amanah (PSA) ti ditumbuhka empat taun ke udah patut dikerembai sereta dikemeranka ba sekula serata menua, berindik ari sekula ti keterubah endur bejalaika projek nya udah ngayanka asil ti positif.
Menteri Pelajar Malaysia Tan Sri Muhyiddin Mohd Yassin madahka nya begunaka belanja sereta chara belajar enggau ngajar (P&P) ti dikemeranka dalam Program Sekolah Amanah dipejalaika bererenggat.
“Aku ngarapka ukai semina 1,000 tang 10,000 buah sekula ke bisi dalam sistem sekula menua ke diatu ulih ngemeranka semua chara tauka konsep P&P ti ditemu ba Program Sekolah Amanah.
“Lalu kitai ngarapka ulih dipejalaika bererenggat jemah ila. Kami opis menteri dekaka kerejasama enggau Yayasan Amir diteruska ukai naka tu aja.
“Nya alai aku minta mayuh agi piak kompeni gerah jari meri bantu ngambika Program Sekolah Amanah ulih dikerembaika ngagai mayuh agi sekula bukai jemah ila,” ku iya.
Muhyiddin ti mega Sapit Menteri Besai mansutka pekara nya lebuh bejalaika pengawa ngagai Program Sekokah Amanah ba SK Tabuan Kuching ditu, lemai kemari.
Bisi lima buah sekula di Sarawak ti udah masuk Program Sekolah Amanah iya nya SK Combined; SK Empila; SK Tabuan; SM Sains Kuching enggau SMK Seri Setia (ti dikelala enggau nama SMK Bandar Kuching 2).
Konsep Program Sekolah Amanah iya nya ngemeranka beberapa pekara nyengkaum ngangkatka kualiti ngatur enggau nyadi ketuai; ngemanahka kualiti P&P, nambahka penyulut enggau peluang nembiak sereta ngenegapka kaul entara sekula, apai indai enggau raban bansa.
Bejaku baru iya madahka diri arap bendar Program Sekolah Amanah mayuh mai transformasyen ngagai sekula baka ti dilangkar dalam Pelan Pembangunan Pendidikan Malaysia (PPM) 2013-2015.
Bepelasarka sebengkah pansik ti dipejalaika Universiti Melbourne Austrlia bekaul enggau Program Sekolah Amanah ku iya endang ngayanka pangka positif nyengkaum nambahka kompentensi pengajar maya proses P&P dalam kelas.
“Penyereta apai indai enggau raban bansa dalam proses pelajar sereta nuju transformasyen endang senipak enggau juluk PPM 2013-2025.
“Opis Pelajar Pelilih Mit (PPD) enggau Opis Pelajar Nengeri mega bejalaika tanggungpengawa ngemuntangka pengawa nyalin tauka nukai polisi ngagai aplikasi dalam kelas kelimpah ari matau asil,” ku iya.
Naka kediatu bisi 30 buah sekula serata menua nyereta Program Sekolah Amanah.
Nyempulang Muhyiddin kemari, Menteri Pengatur Pemansang Pengeraja Asal enggau Rampa Menua II Datuk Amar Awang Tengah Ali Hasan ngarika Kepala Menteri Tan Sri Datuk Amar Adenan Satem, Menteri Pengintu Pengelantang, Orang Indu enggau Pemansang Ruang Bilik Datuk Fatimah Abdullah, Ahli Lemabaga Amanah Yayasan AMIR ti mega Penasihat Pendididkan Khazanah Nasional enggau ke bukai.