SIBU: Perintah udah nentuka sitak menua Semop enggau Pulau Bruit dikena nambahka penyampau industri ngaga kapal ba nengeri tu.
Menteri Pengatur Pemansang Pengeraja Asal enggau Rampa Menua II Datuk Amar Awang Tengah Ali Hassan madah, puku dikena ngangkatka dua bengkah menua nya deka dipansukka ba Pelin Pemansang Malaysia Lumpar Ke-11 (RMK-11).
“Sibu sebengkah menua alai ngaga kapal ke dieksport ngagai menua bukai baka Singapore, China, Arab Saudi, Vietnam enggau menua tasik bukai.
“Kelimpah ari nya, palan tu mega bisi digaga di Rantau Panjai, Sibu tang dua bengkah palan tu udah penuh tauka udah enda chukup pemesai agi nejuka perintah deka nambahka palan nya di Semop enggau di Pulau Bruit,” ku iya.
Taja pan baka nya ku iya, puku enggau pemesai palan tu empai ditemu dulu.
Iya mantaika jaku nya pengudah bejadika Pengerami Nutup Seminar Program ‘Meneroka Peluang Dalam Sektor Perdagangan dan Perindustrian’ beserimbai enggau ‘Minggu Perusahaan Kecil dan Sederhana’ ba sebengkah hotel ditu, kemari.
Sama bela bisi datai maya tu iya nya Menteri Muda Pengatur Pemansang Industri ti mega Menteri Muda Pemansang Menua Pesisir enggau chairman komiti pengawa Datuk Julaihi Narawi, Menteri Muda Pengatur Pemansang Pengeraja Asal Datuk Mohd Naroden Majais, Kaban Kunsil Nengeri (ADUN) Nanga Annuar Rapaee, ADUN Jemoreng Abu Seman Jahwie, ADUN Daro Murni Suhaili enggau ADUN Balingian Yossibnosh Balo.
Ba seminar ke digulu 555 iku penyereta sehari nya bisi mantaika enam bengkah keretas kereja.
Keretas kereja tu dibantai Malaysia External Trade Development Corporatioan (MATRADE), Malaysian Investment Development Authority (MIDA), SME Bank, Malaysian Industry-Goverment Group for High Technology (MIGHT), The Office of Domestic Trade, Co-operatives and Consumerism (PDNKK) enggau State Planning Unit (SPU) ari Opis Kepala Menteri.
Ba jaku iya maya bejadika pengerami nya, Awang Tengah madah, perintah mega deka numbuhka palan dagang ba sebengkah endur di sitak Sibu tang agi nganti pemendar dulu.
Pemutus nya digaga ku iya laban Sibu ngembuan pengelebih alai numbuhka Industri Mit enggau Jelan Pemesai (IKS) kelimpah sebengkah menua ke strategik nyerumba penumbuh Projek Tau Dikena Baru Sarawak (SCORE).
“Kitai deka berunding enggau perintah nengeri ngambi bejadika perambu tu ba RMK-11 alai kitai mega deka bejadika aset industri seraya ngangkatka IKS ba sitak tu nyerumba SCORE ukai semina bepelasarka industri berat aja tang mega bisi ngaul pemansang IKS,” ku iya madahka baru.
Nambahka nya, perintah diatu chakah numbuhka industri ba menua pesisir nyengkaum pasr-pasar ke mit alai diatu mega perintah udah nentuka 77,000 hektar pemesai tanah di Tanjung Manis alai ngaga ‘hab halal’ ungkup industri barang pemakai, framaseutikal enggau kosmetik.
Awang Tengah mega madah, perintah chakah ngemansangka sitak Sibu nyadi ‘Food Basket’ bepun ari ke besemak enggau sitak Sarikei ti tebilang enggau barang pemakai.
“Nya alai, rayat bagi sitak Sibu patut nyungkakka diri ba pengawa dagang nyengkaum IKS lalu anang semina meda makit sida ba menua tu aja tang nyentukka ba makit antarabansa.
“Perintah nyediaka macham bengkah bantu enggau program ke diungkup ngagai orang dagang menua tu lebih agi IKS.
“Tang sayau bendar semua bantu enggau program tu semina dikena mimit aja,” pia ku iya nerang.
Berebak enggau tu Awang Tengah bisi madah, menua baka Kazathan enggau Bosnia ti kaya enggau pengeraja asal pechayaka kompeni ari Malaysia ba pengawa industri kapal, ngulihka gis enggau minyak, produk pemakai, ubat enggau kosmetik.
Kelimpah ari nya, iya madah menua Dubai mega bisi minta kompeni ari menua tu numbuhka kilang tauka industri ba menua nya lebih agi industri barang pemakai.
“Tu kelai orang menua bukai pechayaka kompeni ari menua kitai lalu pekara tu patut dikena kitai nyungkakka agi dagang diri rembus ba makit dunya,” ku iya madah baru.
Maya tu mega iya madah, nitihka ripot ari MIDA bagi timpuh bulan Januari nyentuk March taun tu, Sarawak mujur ngerikod RM7.3 billiun ari pengawa beranakka puku iya nya rikod ke pemadu tinggi di serata Malaysia.