KUCHING: Raban bansa Penan ke dipindah ngagai palan pengentap pendiau Projek Tekat Ai Murum ngenataika sebana dia jalai alun ke disedia udah balat jai kelebih agi enti maya ujan lalu mai penanggul maya sida nganjung bala anak ke sekula tajapan ngena entuka pikap (4WD).
Pemesai Komiti Pengintu Pendiau Mensia Menua Malaysia tauka Suhakam James Nayagam madah, pekara nya entara sekeda isu ke bisi dikenatai ngagai iya maya nemuai ngagai palan nya bedau lama tu tadi.
Iya nerang, ba sebengkah randau ke diatur begulai enggau kepala pengajar sereta sapit iya di sekula primari ke digaga ungkup raban ke mindah ngagai palan pengentap pendiau nya, iya dipadah kebuah nembiak suah enda nurun sekula maya hari ujan ketegal jalai balat luchak lalu enda likun ditengah sebarang bansa perengka pengangkut.
“Pengawa besekula raban nembiak suah tejanggal ketegal hari ujan ke alai jalan enda likun ditengah.
“Kepala Pengajar merambu ngaga palan endur diau ungkup pelajar lalu nya seiti chara mutar penanggul ke ditapi. Penyampau 120 pelajar belajar ba sekula nya ke diajar 15 iku pengajar,”ku iya kemari.
Ba penemuai ke diatur tim ari Sarawak Energy Berhad (SEB), Nayagam madah sida bisi mega nemuai ngagai palan pengentap pendiau Long Malim lalu betemu enggau komuniti dia.
Sida seraban mega nemuai ngagai Long Wat di palan pengentap pendiau Tegulang ke alai sida mega ngatur randau begulai enggau Chairman Komiti Pemansang Penan Murum Labung Paneh.
Nagayam madah ba randau sida nya, bansa Penan ke diau dia bisi madahka sekeda tiang rumah sida bisi udah jai.
Sida (Penan) mega madahka timpuh bekal lekterik ke ngena generator kelalu pandak.
“Diatu, lekterik disedia berengkah jam 6 lemai nyentuk 12 tengah malam, sida ngarap diberi bekal lekterik 24 jam,”ku iya.
Nayagam nambah, bansa Penan ke mindah bisi madahka iya, dia sida disemaya diberi pampas RM850 ninting bulan (RM250 mata duit enggau RM600 ba bengkah pemakai), tang pemeri nya kadang bisi kadang nadai.
Iya madah, tebal agi bansa Penan deka ke mata duit RM450 lalu laluh nya diberi nengah bantu pemakai.
Sida mega disemaya diberi 15 hektar tanah tiap ruang bilik sereta bantu ba pengawa betanam betupi sebedau projek dipejalai, tang naka ke diatu semua nya lalu bedau diberi.
“Suhakam ngarap ulih ngadu randau enggau semua orang ke bekaul, sida ti kena bungkur projek nya ngambika penanggul enggau isu ulih diputar,”ku iya.