SRI AMAN: Perintah enda kala leju meri pemansang ungkup rayat ba nengeri tu enda ngira ba dini endur sida diau, pia ku Menteri Pemansang Orang Indu, Ruang Bilik enggau Raban Bansa Datuk Seri Rohani Abdul Karim.
Iya madah, perintah deka terus bebendar ngereja pengawa nyentukka juluk ulih japai.
“Tu KPI perintah dalam ngangkatka tikas NKRA baka ke disebut dalam penemu 1 Malaysia, “ ku iya.
Iya ti mega nyadi Kaban Parlimen Batang Lupar madah munyi nya rambau Bejadi Pengerami Ngiling Tikai Gawai Dayak 2014 ke diatur Komiti Pemansang enggau Pengelikun Kampung (JKKK) Rumah Suyung, Stumbin Sri Aman enggau Opis Servis Pengari Rayat Parlimen Batang Lupar bepalan ba Rumah Suyung dtu malam kemari.
Iya madah, taja pan rayat jauh ari pemansang infrastruktur, perintah tetap terus deka meri bantu nyentuk sida ngasaika pemansang sebaka enggau orang bukai.
Iya madah, kitai ukai nyebut tauka besemaya lebuh datai maya pengawa bepilih, tang meri pemansang ngagai rayat ninting maya.
“Tu semaya perintah, genap sukung ari tayat nya deka dibalas nitighka pematut enggau peminta ke dikingin sida,” ku tandu iya.
Sama bisi datai, Penulung Direktor Opis Pengintu Pengelantang Pendiau Raban Bansa Menua Sri Aman, Sharifah Ranimah Wan Hashim, Penulung Khas Kaban Kunsil Nengeri (ADUN) Lingga, Nassir Johan, bala ketuai opis enggau tuai raban bansa ke bukai.
Berebak enggau pengerami nya bisi diatur pengawa ngetas ranyai enggau pengawa ngiling tikai nyadika tanda nutup Gawai ba rumah panjai nya.