MIRI: Komiti Pemansang enggau Pengelikun Kampung (JKKK) ke udah ditumbuh dikena ngintu pengelantang pendiau rayat mayuh patut chakah agi ngelaban kes jenayah.
Menteri Muda Penyambung, Datuk Lee Kim Shin madah bisi sekeda ari raban JKKK ditu agi ‘tinduk’ lalu nadai nemu utai ke nyadi ba endur ke dijaga sida.
“JKKK patut nyadi mata enggau pending perintah dalam nyaga pengelantang enggau pengelikun kampung lalu ukai nutup mata enda nemu utai ke nyadi ba endur ke dikuasa diri,” ku iya lebuh dirandau media apin lama ke udah.
Iya mega ngasuh JKKK ngatur program ke ulih dipasuk semua orang lalu ukai ngatur program ungkup sekeda orang aja lalu nadai ngibuhka orang bukai.
“Kami amat asa meda JKKK ke puntan bejalaika tanggung pengawa diri kelebih agi ba pekara ke besangkut pait enggau pengawa ngelaban jenayah ba kampung-kampung,” ku iya.
Lee ti mega nyadi Kaban Kunsil Nengeri Senadin madha munyi nya lebuh dipinta ngemansutka penemu bekaul enggau kes enchuri ke nyadi bejurut ba Pasar Tamu Pujut Corner, pun bulan tu tadi.
Ngenang sentang penusah nya, Lee madah raban nembiak ke bisi penanggul patut diperunding nengah chara ngatur program ke ulih meri penguntung.
“Kami chukup ngemeratka kes ti bisi besangkut paut enggau raban sida tu lalu kami deka meda JKKK ke besangkut paut ngatur program ungkup raban orang ke dituju,” ku iya.
Nangkan ke nya, nyema JKKK bisi betapi enggau pekara ke besangkut paut enggau jenayah, raban sida patut madahka pekara nya ngagai Komiti Rayat mayuh (RC), ti bela diarika raban penerit adat.
“Kami enggai meda JKKK nadai pedulika raban orang nembiak ke bisi penanggul ba kampung-kampung tang ajar sida awakka manah ulah,” ku iya.
Lee yti mega nyadi Menteri Muda Pengawa Lumba, amdah endang patut amat nyema raban orang bisi penanggul dibai nyereta program pemanah ulah dikena nentuka sida nadai enggau orang ngereja ulah ke enda menuku.