Pengajar diatu majak berat tanggung pengawa
SRI AMAN: Bidang pelajar baka ke udah dirintai dalam Polisi Pelajar Menua endang ngemeratka pengawa nempa raban bansa ke ulih beserakup nengah seiti sistem pelajar nasyenal, pia ku Kaban Kunsil Nengeri (ADUN) Lingga, Simoi Peri.
Iya madah, pemisi sekula-sekula perintah ke udah ditumbuh lalu nguna jaku nasyenal nyadi jaku ke dikena ninting hari maya ngajar endang beguna amat dikena ngemuntangka bala nembiak sekula ari mayuh pupu raban bansa belajarka kurikulum ke sebaka, nguna jaku ke sebaka sereta nyamai berandau enggau pangan diri.
“Nengah sistem pelajar nasyenal nya, kitai meseti ulih ngadaka peranak menua ke ngembuan ati sayauka menua sereta ngembuan ulah ke menyana. Sida mega nemu sejarah penatai asal menua enggau bebasaka undang-undang menua tu,” ku iya.
Simoi madah munyi nya rambau bejadi Pengerami Hari Pengajar 2014 Renggat Pelilih Menua Sri Aman bepalan ba sebengkah hotel ditu apin lama ke udah.
Ba pekara nya, ku iya raban pengajar dilalau ngambika lebih nemu pendiau pelajar ke maya hari tu iya nya nempa ‘mensia nyadi mensia ke menyana’. Pengawa tu ukai utai ke senang laban pengajar mega patut ngembuan ulah ke mereti awakka ulih ngajar sereta nyadi teladan ngagai nembiak ke diajar sida.
“Pengajar patut ngembuan ulah ke mereti awakka dikerindu sereta nyadi endur bala nembiak sekula betanya.
“Pengajar diatu enda ulih agi nitihka chara ngajar baka 10 tauka 20 taun ke dulu suba, laban nembiak sekula ke maya hari tu majak pintar, setipak enggau ubah menua ke mayuh pemar, nya alai pengajar patut nyikap diri enda ngira maya,” ku tandu iya.
Nangkan ke nya, iya madah ngemayuhka aktiviti maya belajar baka nengah kuiz, forum, belaban penemu, ngaduka projek, ngereja pengawa beraban enggau ngaduka pengawa ba luar kelas chukup manah amat.
Aktiviti ke bansa nya deka meri peransang ngagai nembiak sekula berunding, berandau, ngaga pansik, nyediaka nota enggau ngasilka pengawa ke ngujungka sida tau bulih penemu ke baru.
Nya alai, ku ku iya nembiak sekula ti kreatif enggau bepenemu deka nyadi seiku orang ke seruran berunding, deka ngaga utai, ngembuan juluk ke tinggi, berani sereta pechaya ngagai diri empu.
“Tu meh gaya pelajar ke patut ditempa kitai awakka sida tau nyadi peranak menua ke ulih napi pemar dudi hari kelebih agi maya datai taun 2020 ila,” ku iya.
Sama bisi datai ba pengerami nya, Pemesai Opis Pelajar Pelilih Menua Sri Aman, Vevien Mujah, Penulung Pemesai Opis Pelajar Sri Aman, Mohd Yusof Lugom sereta Sapit Residen Pemansang Bagi Menua Sri Aman, Philip Peter Salam.
Berebak enggau nya, Simoi bisi nyuaka ‘Anugerah Tokoh Guru Peringkat Daerah Sri Aman 2014’ ngagai tiga iku pengajar iya nya Pengajar Ahmad Abdullah, Tan Kah Hui enggau Brinau @ Gemong Juntang.
Maya pengerami nya mega, Simoi bisi nyadaka agih belanja ngagai komiti Pengerami Hari Pengajar Pelilih Menua Sri Aman ungkup taun 2014 enggau 2015 ke sama bulih RM 20,000.