BALINGIAN: Rayat ba pelilih mit Balingian ke bisi minta ‘Skim Rumah Mesra Rakyat (RMR) 1Malaysia’ ari Kompeni Pengawa Berumah Menua Berhad (SPNB) ngarapka kompeni nya ulih meri penerang enggau lengkas bekaul enggau status peminta RMR sida sekalika diterima tauka enda.
Kebuah pia laban raban nawa tanah ke diperambu dikena nirika 20 unit RMR ba sitak Kunsil Nengeri (DUN) Balingian nya diatu nya repa laban babas enggau lalang kenyau dua taun ke udah pengudah 20 iku rayat diinterbiu dikena minta RMR 1Malaysia maya taun 2012.
Seiku orang ke bisi minta iya nya, Hanu Amin, 46, madah bala sida chukup ngarapka status minta RMR nya ulih diputar enggau lengkas sereta diberi penerang awakka sida nemua kebuah penanggul projek nya.
“Udah dua taun kami nganti tang rita sentang status peminta kami nadai bisi didingga nyentukka diatu,” ku iya madah ngagai Utusan Borneo.
Hanu madah, baka buah rian semina bau renggut tang bulat ba dalam baka nya meh nasib 20 iku sida ke bisi minta, terubah ningga gagit ati maya diinterbiu sentang minta skim RMR itu.
“Kami diinterbiu maya taun 2012, udah nya nerima surat ke ngasuh nganjung dokumen ke besangkut,” ku iya.
Iya madah, syarat bukai nyengkaum peminta ngasuh nyendiaka geran pala tanah ke udah diaku, fotostat tingki pengempu tanah, fotostat setipikit rasmi (pemadu baru) ari Opis Tanah, surat pemendar ari orang bempu tanah enggau surat sempekat.
“Penanggul iya, tentu kami enda ulih nyendiaka surat pala tanah ba kandang menua ke deka alai ngentak rumah RMR nya laban tanah nya dipenggi perintah,” ku iya.
Seiku sida ke sama bisi minta RMR Medihi Apor, 45, madah, “Aku enda tusah ati sereta enda mereti sentang status RMR ke dipadah ungkup rayat di Balingian tu.”
“Terubah iya kami diinterbiu nitihka gintir diri empu, kami chukup gaga sereta meri terima kasih laban deka diberi RMR nya. Udah diinterbiu kami andal sereta ngasaika peminta kami nya mujur laban nya endang juluk ati kami.
“Udah nya kami dipinta ngangkat sumpah enggau mayar setem, terus dititihka kami.
“Tang, dua taun enam bulan udah nya, aku nadai agi nerima nama-nama berita ari kompeni nya, pia mega bisi dipadahka dokumen peminta ke udah dianjung nya enda chukup syarat dikena nyukung peminta aku.
“Nama utai ke nguji digaga aku enggau bala peminta bukai iya nya minta raban orang ke besangkut paut berundingka nasib kami lalu meri penerang nama utai ke dikedeka dikena ngemujurka RMR nya,” ku iya.
Medihi madah, mayuh rayat ba Balingian chukup begunaka rumah alai diri sebilik ke majak nambah, pia mega bisi ruang bilik tepasa kunsi sereta besekut enggau apai indai diri.
“Pengawa ngaga RMR ba Mukah ungkup fasa satu udah tembu lalu diatu deka masuk fasa dua, tang status RMR ba Balingian diatu nadai didinga rita lalu taba rumah nya udah balat repa,” ku iya.
Nya alai, ku iya rayat Balingian chukup ngarapka pemansang ke udah diperambu perintah nengah skim RMR nya ulih digaga lengkas ngambika meri pengelantang ngagai sebagi ari rayat ditu, udah nya status peminta RMR mega patut dipadah jampat laban udah kelalu lama kami nganti rumah nya.
“Aku mantaika sebana tu ngambika perintah enggau raban orang ke besangkupt paut ulih mantu kami. Enti enda, penanggul tu sigi enda nemu putus sampai ke ila-ila,” ku iya.