Anda di sini

Pengawa juruteknik deka diangkat nyadi kereja profesyenal

Advertisement

KUCHING: Perambu penumbuh Lembaga Pakar Teknologi Malaysia (LPTM) entara inisiatif perintah dikena ngelar jurukteknik nyadi pengereja pengawa profesyenal setipak enggau injinir sereta pakar teknologi bukai.

Menteri Kereja Raya Datuk Fadillah Yusof madah, enti penumbuh LPTM udah ditetapka, pekara nya nyendiaka peluang pengawa ungkup bala juruteknik.

Ku iya, penumbuh LPTM nya ila ulih ngubah anggap raban bansa ti madahka orang ke bisi ijazah sarjana muda baka lutor, injinir enggau luyar dikategori dalam raban profesyenal laban di baruh lembaga nya juruteknik deka dilatih berunding lebih panjai ari pengawa sida.

“Reti iya juruteknik enda agi dipadahka raban pengeraja pengawa ti ngereja pengawa aja tang ulih nyadi pengeluar produk, pemutar penanggul enggau sistem pengelandik bisi ba sida.

“Kami (perintah) deka berundingka pekara tu ila, dikearapka penumbuh LPTM ulih ditetap tauka diputuska, ari nya peluang gawa ke raban juruteknik, pakar teknologi enggau profesyenal bukai ti lebih nyata,” ku iya bejakau ngagai raban pemberita pengudah bejadika ‘Seminar Profesional Juruteknik Kebangsaan’ ditu kemari.

Bejaku baru iya madahka diatu perintah agi nentuka sekalika LPTM dibaruh opis menteri iya tauka Opis Menteri Sains, Teknologi enggau Inovasi (MOSTI).

“Penumbuh LPKM nya perambu tauka juluk Persatuan Teknologi dan Kejuruteraan Malaysia (MYSET). Diatu kitai udah bisi semua gerempung profesyenal ke dijaga Opis Kereja Raya (JKR) aja, bisi Lembaga Kejuruteraan, Lembaga Arkitek enggau Lembaga Juruukur.

“Tang nadai udah Lembaga ngarika juruteknik, nya alai LPTM nya ngarika sida ila,” ku iya seraya madahka penumbuh nya begunaka timpuh lama laban patut bisi sukung ari renggat antarabansa.

Nitihku iya tiga sempekat antarabansa ti enda tau enda dikemeratka dalam penumbuh LPTM iya nya Washington Accord, Sydney Accord enggau Dublin Accord.

Berindik ari nya iya ti mega Kaban Parlimen Petra Jaya minta juruteknik ngangkatka pengelandik diri awakka tetangkupka peminta guna ari raban bansa, pengaji enggau industri.

Kelimpah ari nya Fadillah lebuh bejaku ba pengerami nya madahka seminar ti diatur sehari nya pemun baru ngagai juruteknik ti deka nyadi lebih manah laban mayuh pekara baru ke patut dipelajar.

“Kitai temegah ati ngagai Politeknik Malaysia Kuching Sarawak laban ti udah mujur ngatur seminar baka tu. Aku arap bendar deka mayuh agi seminar baka tu diatur jemah ila,” ku iya.

Sama bisi ngulu atur pengawa nya, Direktor Bahagian Latihan Kerjaya dan Pembangunan Kurikulum Jabatan Pengajian Politeknik Mohd Ghaus Ab Kadir, Presiden MYSET Datuk Dr Abang Abdullah Abang Ali, Direktor Politeknik Malaysia Kuching Sarawak Clara Ong, Direktor JKR Negeri, Zuraimi Sabki enggau Direktor Unit Pembangunan Tenaga Kerja Opis Kepala Menteri Prof. Datuk Dr Rahman Deen.

Advertisement