Berita nya semina spekulasyen aja
SIBU: Ex Chairman Parti Se’ati Rayat Sarawak (SUPP) Pampang Sibu Datuk Seri Wong Soon Koh kemari ngenggaika ripot ke bisi nyebut iya deka nyereta People’s Alliance for Justice of Peace Party (Peace Party-Sarawak).
“Tu semina spekulasyen aja. Kelalu mayuh spekulasyen bekaul enggau gaya politik di nengeri tu diatu.
“Nama aja utai ke digaga kitai, kitai deka ngaga nya laban ngemeratka penyukung sereta nitihka peminta sida,” ku iya madah ngagai pemberita pengudah pengawa mungkal tanah ungkup Pusat Sukan Tertutup Bersepadu ke beungkus RM39 juta ba Jalai Padang Bilun Lama ditu.
“Kami mega deka ngaga utai ke bansa nya dalam ayu Barisan Nasional (BN). Kami deka besaup awakka nyapai juluk ke udah diletak Barisan Nasional,” ku iya.
Wong ti mega nyadi menteri senior megai tanggung pengawa nyadi Menteri Perintah Pelilih Menua enggau Pemansang Raban Bansa, kena 15 Mei tu tadi begulai enggau 10 pengari rayat ke bukai madahka ngebuka diri ari parti diri empu lalu tama Parti Tenaga Rakyat Sarawak tauka TERAS lalu nyukung BN.
Beberapa hari udah nya, surat kabar China bisi ngeripotka Wong nyangka deka ninggalka TERAS lalu masuk Peace laban iya enda tentu nyamai asai kediri-diri nyadi pengari rayat China dalam TERAS.
Wong madah, iya enggau bala penyukung iya deka terus nyukung Menteri Besai Datuk Seri Najib Tun Razak enggau Kepala Menteri Sarawak Tan Sri Datuk Amar AdenanSatem.
Dulu ari nya, dalam jaku iya Wong nyadaka pengandal ati ngagai stadium baru nya deka ulih meri peransang ngagai bala atlet di nengeri tu nyapai tikas pengelandik ke lebih tinggi dalam bidang ke dipilih sida.
Iya madah, stadium nya deka tembu kena bulan March 2016 lalu deka nyadi stadium ke pemadu besai sereta moden ba nengeri tu.
“Stadium nya deka nyendiaka apak ungkup 10 gelanggang badminton tauka dua gelanggang main bol keranjang tauka tiga gelanggang main bol tampar. Bisi mega nyendiaka palan endur duduk ungkup 4,250 iku penonton nyengkaum trek endur belanda enggau gimnasium,” ku iya serata madahka pengawa ngaga pegung nyemerai benung diperunding.
Wong mega madah, Librari Teknologi Pemadah Sibu beungkus RM25 juta, enggau taman teknologi ungkup Kolej Universiti Teknologi Sarawak (UCTS) deka digaga sama ba palan nya. — Bernama