KUCHING: Parti Rakyat Sarawak (PRS), ke tumbuh bepuguka Parti Bansa Dayak Sarawak (PBDS) ti udah dikinsil, madahka gaya politik ba pun taun 1980 enggau diatu bebida laban PBDS maya nya sebuah parti penyakal ba nengeri tu tang bekaban enggau BN ba tikas nasional.
Nya alai ba penemu PRS gaya politik ke diatu nengah pengawa numbuhka Teras enda sebaka enggau PBDS maya urung dalam taun 1980.
Ku Kaban Kaunsil Besai PRS Dr Richard Will Uban, maya PBDS suba, parti SNAP enggau PBDS betapi enggau pangan diri maya pengawa bepilih ngena lambang sida empu.
“PBDS penyakal ba tikas nengeri tang bekaban enggau BN ba tikas perintah besai. Taja pan enda ibuhka presiden SNAP, niang Datuk Amar James Wong, tang diatu enti pekara nya ditunda, kitai mega tau enda ibuhka tiga iku presiden komponen parti,” pia ku Will madah ngagai The Borneo Post ditu kemari.
Iya bejaku munyi tu lebuh ti ngenang berita ti dibantaika surat kabar The Borneo Post apin lama ke udah ti madahka penanggul ke ditapi Teras sebaka enggau pekara ke ditapi PBDS dalam taun 1983-84, ti deka dititihka Teras ngenamaka diri ngagai BN.
“Taja pan parti nya ngemeratka lambang ti dikena lebuh penyarut nya nyadi urung dalam dalam taun 1980, tang pekara ke nyadi diatu bebida laban ketetiga buah parti komponen BN deka ngena lambang BN ngelaban Teras. Pekara nya deka nyaruka runding laban Teras diatu madahka diri bekaban enggau BN,” pia ku Will.
Iya ngaku taja pan bisi pekara ke sebaka enggau pekara ke benung nyadi sereta ke udah nyadi, tang ke bendar nampak endar bebida.
“Ba pekara tu, kami arapka pemuntan penanggul politik ke nyadi dalam BN nengeri diatu ulih diputar laban Teras madahka diri bekaban enggau BN. Taja pia, sempekat BN deka diaku, dipebasa sereta enda tau dikemelakangka,” pia ku iya.
Ku Will, PRS sebuah parti ti bepelasarka kandang menua pesisir deka chakah agi ngemeratka pekara meri kuasa ngagai peranak menua pesisir kelebih agi raban Dayak ngambika ngembuan jalai pengidup ke manah agi dalam BN.
Nya alai ku iya, seiti chara ngambika parti nya engkeman belama iya nya negah chara ‘berakup runding’ enggau dua buah parti komponen BN iya nya parti SUPP enggau SPDP baka ti dikedekaka presiden PRS, Tan Sri Datuk Amar Dr James Jemut Masing.
“Kokus nya udah diterima ketetiga kaban parti komponen. Penemu ke deka “berakup runding” nya dikemeratka Tan Sri Datuk Amar Dr. James Jemut Masing patut diperatika nengah sukut ke positif sereta chara ke manah dikena mutarka penyarut politik ti nyadi dalam BN nengeri kelebih agi ba ketetiga buah parti komponen nya.
Ku iya baru, kaban ke betul ukai semina ulih dikena ngeringka perintah champur ke ngembuan juluk deka ngambi pulai penuduk, tang sebengkah ari chara kena raban komponen ngenuku tauka ngaku sempekat ke udah digaga dalam gempung nya.
“Tu pengemun ke baru ungkup garis entara ke baru. Engka kitai deka meraka jematan baru nengah mayuh macham pekara ke enda disadang deka nyadi. Enti kitai semua begempung, nya baru mensia mayuh nemu reti pekara ti dikemerat lebuh parti komponen sama betulung pangan diri.
“Kitai udah chukup parti dalam gempung kena ngarika mayuh bengkah pupu raban bansa, enti kitai ngembuan mayuh agi parti ketegal nadai kebuah, nya semina deka mambarka kitai. Nya mega deka ngelemika BN menua sereta ngeringka penyakal,” ku iya.