KUCHING: Agi mayuh orang dagang kedai pemakai enggau ai irup di mengeri tu enda ngerejista kedai diri ba ‘Unit Keselamatan dan Kualiti Makanan’ di baruh Opis Pengerai Pelilih Kuching.
Pemesai Opis Pengerai Pelilih Kuching Dr Kamaruddin Lajim madah, urung 5,000 kedai nyual pemakai enggau ai irup di mengeri tu, tang semina 400 ari penyampau nya ti udah direjista.
“Nya alai, kami minta orang dagang pemakai enggau ai irup ngerijista dagang diri dikena nyeliahka ari seberang atur penerit undang-undang.
“Enti kedai nya enda direjista iya deka ditinggang atur undang-undang di baruh ‘Peraturan-peraturan Kebersihan Makanan 2009’ ti ulih ditinggang ukum nyentuk RM10,000 tauka jil enda lebih ari dua taun,” ku iya.
Dr Kamaruddin madahka pekara nya dalam aum pengarang berita ‘Operasi Premis Makanan Bersih 2014 Fasa Kedua’ ti diatur berengkah 16 nyentuk ke 19 Jun tu tadi ditu.
Iya madah, pengawa ngerejista kedai nya nadai bebayar lalu kedai ke direjister nya deka seruran dipatau ari segi pemeresi sereta pengelikun pemakai enggau ai irup dikena nyeliahka ari sebarang penyakit ngerampit.
“Pengerejista nya bisi prosedur, tang kedai nya deka seruran diberi lalu bekaul enggau nyaga pemeresi kedai sida.
“Nya ukai semina meri pemanah ngagai pengempu kedai tang mega ngagai orang mayuh ti makai ba kedai lebih agi bekaul enggau pemeresi pemakai ke diempa,” ku iya.
Orang dagang pemakai enggau ai irup ulih ngerijista kedai sida nengah website http://fosimdomestic.moh.gov.myhttp://fosimdomestic.moh.gov.myhttp://fosimdomestic.moh.gov.myhttp://fosimdomestic.moh.gov.my.
Operasyen ti dipejalaika Opis Pengerai Pelilih Kuching nerima sukung ari piak penerit adat nyengkaum Opis Kaunsil Kandang Bandar Padawan (MPP), Kaunsil Bandaraya Kuching Utara (DBKU) enggau Kaunsil Bandaraya Kuching Selatan (MBKS).