NGEPAN DIKENA NYAMBUT PENATAI PENGABANG: Raban nembiak lengkap ngena ngepan bansa Iban, nganti penatai pengabang ba rumah panjai sida.
MIRI: Taja pan pengawa Ngiling Tikai dipeda mit tang reti iya besai ba bansa Dayak ti suah nyempulang atur nya ngena macham adat enggau main asal.
“Pekara ti dikemerat maya pengawa Ngiling Tikai iya nya chara nengah adat enggau main asal bansa Dayak ngujungka pengerami ti ngelaika pengulih pengawa bumai ba taun ke udah sereta berengkah mih pengawa bumai, ngulihka padi ba taun ke baru,” ku tuai rumah (TR) rumah panjai Juliana Esah,Sungai Mallang Atas, Bakong, Jalai Bukit Peninjau-Bakong, ditu, apin lama ke udah.
Ba sebarang macham pengerami, nembiak mih orang ke pemadu gagit nyambut pengawa nya.
Sida nembiak mih orang ke pemadu tymu dani, bekenaka ngepan tauka gari, begelumu enggau pangan sebaya nganti pengerami ti semina diintu setaun sekali.
Nya mih senario ba rumah panjai Juliana Esah maya pengawa Ngiling Tikai ka diatur empai lama ke udah.
Rumah panjai tu urung pejalai 45 minit ari bandar nuju Jalai Bukit Peninjau-Bakong, ditu.
Nembiak chukup gagit bekenaka ngepan nganti penatai temuai sereta pengabang ngagai rumah panjai sida.
Di ruai mega dipeda bala indai nyendiaka idang dikena nganti temuai enggau pengabang seraya sida ke lelaki sedia nebah ketebung, tawak engkerumung enggau bebendai dikena ngelalu pengabang.
“Berebak enggau pengerami nya, idang ke diempa enggau utai irup endang disediaka magang kelimpah ari atur pengawa pemerindang bukai dikena ngapuska malam,” ku Juliana Esah nyerita ngagai The Borneo Post.