BINTANGOR: Rumah Peter Minggat, Sungai Mupong Ulin ditu deka ngatur pengerami Ngiling Bidai kena 21 Jun tu ila.
Nitihka penerang ari Tuai Rumah Minggat (gambar), pengerami nya ila deka digulu Kaban Kunsil Nengeri (ADUN) Semop Abdullah Saidol.
“Pengerami tu ila deka berengkah pukul 11.00 pagi lalu kami serumah nesau bala peranak rumah panjai bukai ke besemak bela ngulu pengerami tu,” ku iya madah ngagai pengarang berita, kemari.
Iya mega madah, pengerami ke diatur sida serumah tu besai lalu disadang deka digulu tujuh buah rumah panjai bukai.
Berebak enggau tu mega Minggat madah, sida serumah berasai temegah ati laban pengari rayat sida, Abdullah, enda kala enda datai ngabang ngagai rumah panjai sida maya Hari Gawai tauka pengerami Ngiling Bidai kenyau ke dipilih nyadi ADUN Semop.
“Tu mih sebengkah pengelui Abdullah ke nyadi pengari rayat laban seraya ke nemuai iya ulih nyemetak agi nemu nama penanggul ke bisi nuntung rayat ba menua pesisir baka kami,” ku iya sambil madah rumah panjai sida ulih dilawa kira sejam ngena perau panjai ari pasar Bintangor.