KUCHING: Judi Mangkuk Dunya terus dipuntanka berindik ari tiga agi lelaki ditan dibaruh Ops Soga dalam sebengkah pengawa nyerekap sebuah rumah kedai, ditu malam ensanus.
Ketiga saspek nya beumur 47, 60 enggau 67 taun maya operasi nya, dipadahka benung ngeringak beentaruh ngujungka enda nemu penatai polis ba kedai nya di Kenyalang Park, urung pukul 10 malam.
“Sama dirampas iya nya beberapa lambar keretas burak ti bisi rikod timpuh main enggau penyampau entaruh sereta sepenyampau mata duit,” ku pengari polis.
Pengawa nyerekap dipejalaika Unit Anti Maksiat, Perjudian dan Gangsterisme (D7) Iindu Opis Polis Kontinjen (IPK) Sarawak ti diketuaika ASP Zulkarnain enggau Insp. Khairul Nidzam.
Kelimpah ari nya, D7 Indu Opis Polis Pelilih Mit (IPD) Kuching mega ngetanka seiku lelaki menua tu ti beumur urung 20 lebih di sebuah rumah kedai di Jalan Petanak, ditu malam ke sama.
Orang ke disangka nya ditan ketegal dipelabaka benung beentaruh pekit main bol bepelasarka rikut ba keretas ke ditemu ba iya.
Semua orang ke disangka nya di tan di baruh Seksyen 6 (3) Akta Pertaruhan Terbuka 1953.
Nyentukka ensanus, di Kuching aja bisi enam iku ditan berengkah ari Ops Soga dipejalaika sereta serata menua sepemanjai Kejohanan Bola sepak Piala Dunia 2014.
Nya alai barang sapa ti ditan dibaruh Seksyen 6 Akta Pertaruhan Terbuka 1953, orang ke ngatur uliih diukum maksimum RM200,000 enggau jil lima tahun.
Lalu orang bentaruh (pemain) deka diukum enda lebih RM5,000 enggau ukum jil enda lebih enam bulan.