Dikarang Rengenyan Labang
KUCHING: Nengah Felda Global Ventures (FGV), Seranta (Felda) Opis Menteri Besai chakah meranakka puku dalam kebun bedandang besai kelapa sawit di nengeri tu ke dikearap tau mai pemansang enggau penyungkak ekonomi.
Direktor Seranta (Felda) Opis Menteri Besai Mohamad Khairudin Mohamad madah, nengah program nya di nengeri tu Seranta (Felda) udah meranakka puku nengah Felda Sempadi Lundu sereta jemah ila di Limbang ke baru deka dikemansang.
“Di Nengeri Sarawak lebih agi Seranta (Felda) nengah FGV bisi meranakka puku nengah kebun bedandang besai kelapa sawit di Sempadi (Lundu) sereta di Limbang, tu ulih nyungkak ekonomi.
“Nengah pemansang ekonomi nya, ulih nyendiaka pengawa puang ngagai raban bansa ba endur ti kena bungkur program nya kelimpah ari peluang ngangkatka pengelandik enggau pelajar.
“Pemanah program tu mega ulih ngerapit kaul enggau raban Felda sereta peranak menua pesisir nengah program komuniti,” ku iya.
Khairudin mansutka pekara nya dalam aum pengarang berita Majlis Ramah Mesra Seranta (Felda) Opis Menteri Besai Begulai enggau Media & Opis Pemandah Nengeri Sarawak ti diatur ba sebengkah hotel ditu kemari.
“Ditu aku mega madah, kami ukai semina bisi lebih 12 FGV di serata dunya, nya nyadika penyambung ke lalu nyendiaka peluang ekonomi enggau pemansang mensia ti ukai semina ungkup peranak Felda aja tang nyengkaum semua raban bansa,” ku iya.
Nitihku iya lebuh ke bejaku ba pengerami nya, di serata Malaysia bisi 160 iku pengeraja pengawa Seranta (Felda) sereta bisi 317 tanah perambu enggau populasi 112,675, lalu berindik ari bisi kaul enggau anak kompeni ngujungka penyampau populasi urung 2 juta iku.
Ngenang pengerami begulai enggau raban media kemari iya ngarapka ulih nempa kaul ti manah enggau raban media di Sarawak.
“Senipak enggau juluk Seranta (Felda) nerangka semua polisi perintah ti deka, benung enggau udah dipejalaika perintah ba raban ti ditaga, kami ngarapka ulih nempa kaul manah enggau raban media,” ku iya.
Nambahka nya tuju Seranta (Felda) ti ditumbuhka bulan Mei 1981 iya nya matau, ngenatai, ngeripot enggau bejalaika program ti ulih ngerembaika penerang bekaul polisi perintah enggau Felda ngagai peranak Felda.
Sama bisi ba pengerami nya kemari, sapit Direktor Seranta (Felda) Nengeri Sarawak, Opis Menteri Besai Awang Safri Awang Ahmad, Sapit Direktor Opis Pemadah Nengeri Sarawak Zaini Mohamad, pengari gerempung media Alice Wee enggau raban media.