KUCHING: Semilan finalis deka bepekit berebutka gelar Juara Lagu beserimbai enggau Anugerah Carta Sapa Juara? (ACSJ) ke deka diatur ba Betong kena 21 Jun (Hari Enam) tu.
Pekit final ACSJ tu ila deka diatur ba Dewan Tan Sri Datuk Amar Stephen Kalong Ningkan berengkah pukul 6.30 lemai.
Program tu diatur WAIfm (Iban) RTM Sarawak lalu bepelasarka buah penemu Sapit Kepala Menteri Datuk Patinggi Tan Sri Alfred Jabu Numpang enggau Menteri Kebun Bedandang Besai enggau Komoditi Datuk Amar Douglas Uggah Embas.
Program ninting taun nya dijangka deka dipenyadi Datuk Amar Douglas Uggah sereta digulu enam iku artis ngati kediri enggau tiga band ari menua tu empu bepelasarka populariti sida ari bala peningga WAIfm (Iban) taun seiti ke udah.
“Artis ngati kediri enggau band deka belagu maya seraya ke bepekit berebutka tiga bengkah kategori iya nya gaya pemadu manah enggau sada nyawa pemadu manah ke ngujungka sida deka bulih gelar Juara Lagu,” ku Menija REDfm Affendy Julaihi maya aum pengarang berita kemari.
Semilan buah lagu ke deka disadaka maya nya ila diberi nama Nuan Bujang dibai Leez Zwita, Bajik (Hevance), Aku Rindu Ke Nuan (Jeffery Jack), Agi Menais Litan Demalan (Melissa Francis), Nadai Agi (The Crew), Pengujung Pengerindu (James Jacob), Kelalu Laun (Lucy M), Langit Petang Di Lindung Remang (James Ruai) enggau Kumang Sehari (Masterpiece).
Artis ke bulih gelar Juara Lagu deka nerima perais trofi enggau duit RM3,000, udah nya gaya pemadu manah enggau sada nyawa pemadu manah bela deka nerima perais duit RM1,000 besereta trofi.
Nangkan ke nya, pengeluar program WAIfm Bana Jimbat madah, ACSJ diatur pengudah ke nerima sukung ke chukup manah ari bala peningga serata Sarawak, Semenanjung Malaysia enggau Brunei kenyau Carta Sapa Juara berengkah dikeluarka kena Julai 2011.
“Carta Sapa Juara? Endang sebengkah ari program ke digaga WAIfm ke bepelasarka ngagai kuiz enggau lagu ke bisi diputarka ninting Hari Enam belabuh pukul 3.30 ngagai 5 lemai,”ku iya.
Iya madah, tuju ACSJ diatur dikena nyediaka palan ngagai bala penanyi enggau komposer di menua tu bekunsi penemu enggau pangan diri.
Bela bisi datai maya aum pengarang berita tu Ketuai Bagi Iban WAIfm Thomas Tegong Laka enggau bala komiti pengatur program.