MIRI: Parti Demokratik Progresif Sarawak (SPDP), benung berunding deka ngaduka baru pom nyadi kaban parti nya enggau chara nepu lumur renggat dalam pom nya.
Pemangku presiden iya, Datuk Seri Tiong King Sing, ngemansutka pekara nya pengudah nerima pom peminta dikena ngemasukka nama kaban baru, ari seiku Komiti Besai parti, Josephine Duyuk Tuah, ba Dewan Rayat, Begunan Parlimen ba Kuala Lumpur, minggu seiti ke udah.
“Kami deka ngaduka baru pom peminta nya enggau chara nepu lumur renggat ba genap pom.
“Atur tu dikena ngemuntangka peminta digaga enggau ngiga utai ke besangkut paut enggau bala kaban parti,” ku iya.
Iya madah, pom ke udah digaga baru nya, diatu udah bisi ba opis parti di Bintulu, seraya ngelalau Josephine enggau bala komiti besai ke bukai ngambi pom baru nya dikena ngambi kaban baru.
Nangkan ke nya, Josephine ba penerang iya ditu, madahka pengawa nganjung pom nya ari bala kaban baru parti tau mandangka agi mayuh orang bisi pengerindu nyereta SPDP.
“Tu mandangka agi bisi orang pechaya ngagai SPDP sereta andalka pengawa digaga parti tu, utai tu nandaka SPDP agi nyadi parti politik ke dipilih rayat dikena ngeringka Barisan Nasional (BN),” ku iya.
Ba pemansang ke sebaka, Josephine mega ngarapka baka kaban parti nya ba semua peringkat pampang, deka bekerejasama kelebih agi enggau bala kaban baru awakka pengawa sida ti deka mulaika pengering parti ulih dikereja enggau mujur.
“Kerejasama ke manah beguna amat, kelebih agi pengudah penyarut nuntung parti apin lama ke udah, tang aku pechaya utai nya enda nagang kami angkat enggau ngemansangka parti tu.
“Tambah mega, kami deka nyikap enggau negapka komiti partu dikena napi pengawa bepilih nengeri ke deka datai,” ku tandu iya.