BAU: Karnival Redeems Gawai Dayak ke diatur pengelama empat hari berunggu belabuh 20 Jun ba Pusat Redeems di Kampung Apar ditu dijangka nerima sukung ari rayat mayuh nyengkaum ari bala temuai menua luar.
Chairman Komiti pengerami nya, Datuk Peter Nansian madah, mayuh bengkah aktiviti udah ditusun ungkup pengerami ke diatur Gerempyng Pemansik enggau Pemansang Pejalai Singai Sarawak (Redeems).
“Pengerami tu diatu majak tebilang sereta nerima sukung ke chukup manah kenyau iya berengkah diatur maya 2006, berebak enggau nya mega pengerami tu ulih mandangka main asa bansa Bidayuh,” ku iya madah ngagai Bernama apin lama ke udah.
“Tuju pengerami tu diatur dikena ngayanka pesaka main asal, ngelakuka pemakai asal bansa Bidayuh ngagai bala temuai enggau ngerapitka kaul antara rayat enggau pangan diri, “ ku iya.
Nansian ti mega nyadi Menteri Muda Pemansang Komuniti enggau Pemansang Industri nengeri madah, pengerami nya deka berengkah enggau pengawa miring Gawai ke dikumbai ‘mit ieng podi’ (ngempuruka semengat padi) ke deka dipejalaika ba rumah panjang 12 pintu ke baru tembu digaga enggau pusin keterubah pekit Dayung Sikora (dara bajik), diperindang raban muzik enggau ‘ngabang romin bori’ (ngabang ngagai bilik ke bilik ba rumah panjai nya).
Pekit final dara bajik enggau miring Gawai ‘simutur’ deka diatur kena 21 Jun. Hari seiti, miring Gawai ‘nagruom prien’ deka diatur kelimpah bejualka barang pemakai, ai irup enggau perengka pengelandik hari sepemanjai pengerami nya.
“Aktiviti kepenudi iya nya mandangka main asal ke dikumbai ‘simutur’ ari raban main asal Kampung Suba, Bau ba rumah panjai 12 pintu nya, ku Nansian
Iya madah, Tuai Pemegai Menua Negeri Sarawak Tun Pehin Sri Abdul Taib Mahmud enggau Sapit Menteri Besai Tan Sri Muhyiddin Yassin dijangka deka ngulu pengerami makai malam Karnival Gawai Dayak ba Pusat Redeems, Kampung Apar, Bau kena 23 Jun.
Kepala Menteri Sarawak Tan Sri Adenan Satem enggau bini iya Puan Sri Dato Jamilah Anu, bini Taib, Toh Puan Ragad Kurdi enggau bini Muhyiddin, Puan Sri Noorainee Abdul Rahman mega disadang bisi datai.
Maya pengerami nya ila, Taib deka diberi basa bejadi perambu projek Pusat Kebudayaan Redeems ke beungkus RM8 juta. — Bernama