Anda di sini

MPP deka bejalaika atur ti terit ba orang dagang ke tengik

Advertisement

KUCHING: Pengawa orang dagang ke bedaja di kaki lima, palan endur ngengkah entukar enggau ngemesai kedai enggau nadai pemendar di Kota Sentosa entara sebengkah penanggul ke mar diputar Opis Kaunsil Kandang Bandar Padawan (MPP).

Chairman MPP, Lo Khere Chiang madah, penanggul nya nyemaka semacham penyakit ke mar diperubat lalu semina nganti maya ngelekai nyadi sakit riman pengudah lebih 30 taun ditapi.

“Kitai ukai semina nerima sebana ari rayat ninting hari tang sepemanjai taun.

“Berindik ari nya kitai udah ngatur randau begulai enggau orang dagang ke bekaul kenyau pun bulan Jun tu tadi ke alai MPP minta sida meri kerejasama,” ku iya ba sebengkah aum pengarang berita kemari.

Taja pia, Lo mengkang kesal pengudah mengkang mayuh orang dagang enda mendingka jaku lalau MPP ba randau nya.

Lo nambah, 125 iti notis udah dianjung ngagai orang dagang ke ditemu ngereja penyalah nya.

Ku iya, MPP deka bejalaika sebengkah operasyen mutarka penyalah nya begulai enggau Polis, SEB, JKR, Bomba sereta Opis Tanah enggau Survei (JTS).

Barang sapa ke ditemu ngelaban deka diukum nitihka undang-undang ke nyengkaum ukum jil, ku Lo.

Ba kaul ke sama, Lo madah MPP enda belembut enggau orang dagang ti ngemesaika kedai sida enggau nadai pemendar sereta enda nitihka penetap MPP.

“Diatu sida udah bisi mayuh duit tang nya ukai kebuah sida tau ngemesaika kedai peneka ati, enda minta pemendar ari MPP.

“Kitai patut berundingka pengelikun orang bukai lalu neda sengapa ngeruga pengelantang pengidup sida,” ku iya.

Advertisement