Tanggungpengawa ukai semina dikena ngempung rayat
DARO: Sekretari Politik Kepala Menteri, Abu Seman Jahwie ngelalau bala kaban Komiti Genturung Pendiau (KRT) seruran chakah nambahka penemu diri kelebih dalam bidang teknologi pemadah enggau penyambung (ICT).
Iya madah, pengawa nya beguna amat dikena mantu perintah mantis jaku negatif ke disebar raban orang ke nadai betanggungjawap laban sida seruran deka nguji ngasuh menua charut.
“Nengah penemu ke bisi dikembuan dalam bidang (ICT) nya, raban sida tu ulih nemu sereta nepis penerang ke bula.
“Kitai mega ngelalau rayat kelebih agi sida ke nembiak bejimat-jimat beratika penerang sebedau pechaya ngagai penerang ke dipeda sida.
“Tanggung pengawa KRT ukai semina nyapai agenda penyerakup tang mega sida patut nyadi mata enggau pending perintah kelimpah nyadi media baru ngemetulka penerang ke sengaja digaga limpang ke bukai nengah internet,” ku iya rambau bejadi sebengkah KRT Pelilih Menua Daro, ditu.
Abu Seman ti mega nyadi Kaban Kunsil Nengeri (ADUN) Jemoreng madah, pemujur program ke diatur KRT lebih manah enti dipasuk semua orang kampung kelebih agi sida ke nembiak.
Ba pemansang ke besangkut paut, iya madah raban sida patut bejalaika mayuh program bekonsep penyerakup setipak enggau juluk perintah ngaduka ubah pemansang modal mensia.
Iya madah, penyereta ari rayat mayuh endang juluk KRT mengeri ti nengah maya lepa nyediaka peluang ngagai diri sebilik belelak seraya ngerapitka kaul enggau bala ketuai.
Berindik ari nya, iya madah perintah melabaka deka nempa kampung ke chakah dalam mayuh bengkah akitviti.
“Agih belanja mega deka diberi ngagai kampung ke chakah bejalaika aktiviti.
“Berebak enggau nya, tanggung pengawa KRT ke nyadi pengempung rayat tentu enda ulih dijapai nyema KRT semina ditumbuh kena ngambi nama aja tang enda teaturka sebarang program,” ku iya.
Abu Seman madah, perintah terus meri geran bantu ninting taun ngagai KRT ke udah chakah bejalaika program ba kandang menua diri empu.
“KRT ke chakah deka nerima geran bantu dikena ngemuntangka sida ngatur program ninting taun begulai enggau rayat mayuh,” ku iya.
Nengah prgram nya, KRT dikemendar numbuhka komiti bukai baka Skim Penginau Enda Begaji (SRS) nyengkaum ngidupka kaling-kaling KRT ke dikumbai ‘Jiran Muda’ enggau ‘Jiran Wanita’.
“Nyema KRT ulih bejalaika tanggung pengawa enggau manah, perintah enda kakang ati ngemendarka penumbuh KRT baru baka ke bisi dipeda ba kampung tauka ba kandang genturung pendiau ke bukai.
“Ninting taun, Opisn Penyerakup enggau Integrasyen Nasional ngemendarka penumbuh KRT laban ulih dikena ngerapit kaul rayat antara pupu raban bansa,”ku iya.