SEMPORNA: Dua lelaki nyengkaum seiku penyaga pegung ikan dalam sangkar enggau seiku bansa Suluk ditabanka dua iku lelaki ke mai senjata ba Kampung Sapang, barat Pulau Timbun Mata, ditu tengah malam kemari.
Nitihka ripot tumu madahka, penyaga pegung ikan benama Chan Sai Chiun, 32, asal ari Perak lalu lelaki Suluk nya benama Mazlan beumur lebih kurang 20 taun.
Sida tu ditusuika ditabanka orang urung pukul 12.40 tengah malam kemari ba pegung ikan ke dipenggi kompeni Davel Bay ditu.
Kepala Opis Pemansik Jenayah nengeri, ACP Omar Mamah ngenukuka pekara nya lebuh iya dirandau Bernama.
Tu udah tiga kali kes orang nabanka mensia nyadi ba kandang menua adap ke tasik timur Sabah taun tu.
Kena 6 Mei tu tadi, lima iku lelaki ke mai senjata nabanka seiku menija kompeni pegung ikan peranak menua China ba Pulau Baik, Lahad Datu, lalu kira sebulan udah nya seiku temuai indu peranak menua
China mega ditabanka orang ba sebuah resort di Semporna. — Bernama