SERIAN: Opis Tanah enggau Survei (JTS) udah ngemendarka tanah Adat Bansa Asal (NCR) ba 10 kandang menua di Pelilih Mit Serian disukat sereta digazet dalam taun 2014.
Penguasa Tanah dan Survei Pelilih Samarahan Rozlan Putit madah, tanah nya disukat sereta digazet nengah Seksyen 6 Kanun Tanah Negeri, lalu nya ngayanka perintah amat beratka pekara bekaul enggau tanah NCR nengeri.
“Juluk kami (JTS) taun tu deka nyukat sereta ngazet tanah NCR ba 10 kandang menua di Pelilih Mit Serian ti udah dikemendarka apin lama, ti pemesai urung 61,260 hektar.
“Raban penyukat JTS deka berengkah bejalaika pengawa nyukat dalam bulan Jun tu sereta dipelabaka ulih tembu ujung taun tu.
“Tu dikena ngenukuka pengempu, barang sapa ke nuntut hak ba tanah NCR teulihka hak sekuriti ba tanah ke udah digazet lalu bulih kuasa penuh lebuh tanah nya disukat sereta dikeluarka surat pala tanah nengah Seksyen 18 Kanun Tanah Negeri,” ku iya.
Rozlan mansutka pekara nya dalam jaku pengelalu ba pengerami nyuaka Warta Rizab Gunasama (Pertanian) Bumiputera, Bagi menua Samarahan ti diatur JTS ba Bilik Santapan Dewan Masyarakat Serian ditu, kemari.
Bejaku baru iya madahka, sepemanjai inisiatif baru tanah NCR dipejalaika, JTS udah ngazet sepenyampau 15 kandang menua di Pelilih Samarahan nyadi Rizab Gunasama Bumiputera di baruh Seksyan 6 Kanun Tanah Negeri ti pemesai urung 6,000 hektar.
Tiga ari 15 kandang menua nya udah digazet ti mungkur 13 genturung pendiau nyengkaum raban bansa Bidayuh, Iban enggau Melayu ti nerima gazet seharitu, ku Rozlan.
Genturung pendiau (GP) nya nyengkaum GP Tarat Melawi, Serian ; GP Tarat Sibala, Serian; GP Tarat Mawang, Serian; GP Munggu Lalang, Serian; GP Bunga, Serian; GP Baru Mawang, Serian; GP Taee, Serian; GP Lanchang Sabai, Serian; GP Lanchang Sijo, Serian; GP Segenam, Serian; GP Sg. Turong, Serian; Kampung Muara Tuang, Samarahan enggau Kampung Tanjung Bondong, Samarahan.
“Seharitu kitai nyuaka gazet sereta kar tiga (3) kandang menua iya nya Kandang Tarat, Serian; Kandang Segenam, Serian enggau Kandang Batang Samarahan, enggau pemesai urung 1,625.17 hektar ti disuaka ngagai Penghulu tauka ketuai genturung pendiau ti ngarika peranak (genturung pendiau),” ku iya.
Gazet nya kemari disuaka Menteri Pemansang Infrastruktur enggau Penyambung ti mega Kaban Kunsil Nengeri (ADUN) Tebedu, Dato Sri Michael Manyin Jawong.
Tuju pengawa nyukat tanah nya kelimpah ari ngeluar surat pala tanah sereta ngenukuka pengempu tanah, mega dikena nyeliahka isu masuk enda beradat ngagai tanah NCR laban gazet nya ngayanka entara kandang ti udah disukat ke lalu ulih nyeliahka penyarut enggau berebut takah enggau piak luar.
Sama bisi datai ngulu pengerami nya kemari, ADUN Muara Tuang Dato Sri Mohamad Ali Mahmud enggau ke bukai.