MIRI: Kaban Save Sarawak’s Rivers Network (SAVE Rivers) ngenggaika penerang Sapit Kepala Menteri Datuk Patinggi Tan Sri Alfred Jabu Numpang ke nyebut semina tiga iku mantah Projek Tekat Hidro Baram.
Chairman iya, Peter Kallang madah, penerang ari Sapit kepala Menteri nya enda betul laban nadai ngarika sebana ari rayat Baram ke balat tusah nyema perambu projek tekat nya majak dipejalai.
“Sapit Kepala Menteri ba jaku iya Long Silat madahka, semina tiga iku aja orang mantah tekat Baram.”
“Aku deka nyemetak madahka, SAVE Rivers udah ngumpul lebih kurang 10,000 sain jari ai rayat Baram kenyau ari taun 2008 ngagai 2013 tanda mantah pengawa ngaga tekat nya.”
Peter madah munyi nya ramvbau seminar begulai enggau kaban SAVE RIVERS ke diatur ba sebengkah hotel tebilang ditu kemari.
Iya madah, tambah mega sain nya udah dianjung ngagai ex Kepala Menteri Tun Pehin Sri Abdul Taib Mahmud.
“Kelimpah ari nya, diatu kami agi ngumpul sain kelebih agi ari rayat ke diau ba kandang menua Miri sereta ngelawa tiap-tiap kampung ngulihka sain nya.
Iya nyemetak madahka penemu diri chukup mantah pengawa ngaga tekat Baram lalu minta perintah mai mayuh agi pemansang baka jalai raya enggau perengka guna ke bukai.
“SAVE berasai asa ngagai ketuai enggau bala tuai raban bansa di Baram baka temenggung, ketuai kampung enggau tuai rumah laban enda nemu kekebut ba sentang pekara nya,” ku iya.