KUCHING: Orang ke muka dagang ba Benteng Satok ditu, madahka diri rugi kira 80 peratus pengudah sida iya kena pindah ngagai Medan Niaga Satok, ku Abdul Aziz Isa ti gawa nyadi Penulung Khas Chairman DAP Sarawak Chong Chien Jen.
Ku iya, ukai semina orang ke bedaja ba Benteng Satok komplin madahka dagang sida iya enda tentu laku, tang mega sida ke bedaja ba Pasar Satok Lama bela ngasaika pekara ke sebaka.
“Pengudah sida ke bedaja ba Pasar Minggu enggau Benteng Satok diasuh misah ngagai Medan Niaga Satok ba Kubah Ria pun taun 2013, dagang sida iya majak enda laku.
“Asil dagang sida nadai ngemuaska ati kelebih agi maya Hari Enam enggau Hari Minggu, kenyau sida iya diasuh misah ngagai palan baru,” ku iya lebuh dirandau pemberita kemari.
Iya madah, enti suba menua Satok nya meh ke pemadu rami tang diatu nyau baka ‘nengeri antu’ enti udah pukul 9 malam, lalu ukai semina nya aja, temuai ari luar pan kurang datai.
“Enda mayuh temuai datai kitu agi. Nama reti Perintah mindahka orang ke bedagang tu ngagai endur nya enti ari pun iya suba, sitak tu endang udah tebilang rita dikumbai orang Kubah Ria?
“Pengawa nya semina deka ngemanahka gaya pengawa dagang aja enggau sosio-ekonomi Bumiputera tauka bisi utai bukai?,” tanya iya.
Iya nandu baru, orang ke bedaja ba Benteng nya pan nyau besemekih enggau orang ke bedaja ba Kubah ke endang ditemu udah lama bepalan dia, lalu sekeda nya endang udah bisi pengguna tetap.
“Baka sida ke bedaja ba Benteng nya enda sebaka, laban sida iya agi baru, lalu bepun ari sida diasuh pindah, mayuh pengguna sida nadai kia agi ngelawa sida iya bedaja laban endur sida iya udah pindah ngagai palan ke enda manah sereta balat angat.
“Penguntung orang ke bedaja dia pan nyau majak kusut, manggai 80 peratus bepun ari dipindahka kia lalu bisi sekeda nya, nyau enda bedaja agi laban kelalu mayuh rugi.
“Bisi sekeda nya, enda tan dia agi lalu mindah ngagai Matang, MJC enggau Taman Desa Wira ngicha bulih belanja lebih tauka bisi nambah untung,” ku iya.
Iya madah, sida DAP Tupong kala nganjung surat komplin ngagai opis FAMA, Dewan Bandaraya Kuching Utara (DBKU) enggau Opis Menteri Pengawa Dagang temuai bekait enggau penanggul nya, tang nyentuk ke seharitu komplin nya nadai disaut tauka ditimbal.
“Perintah enda ibuhka komplin DAP bekait enggau penanggul ke ditapi ulih orang bedaja ba Benteng Satok enggau Medan Niaga Satok ngelama tu.
“Ukai nya aja, petisyen mindahka baru orang bedaja nya pulai baru ngagai endur asal sida iya di Satok mega enda dikibuhka ijinsi perintah nya,” ku iya.
Iya madah, sebedau tu pan, Kaban Kunsil Nengeri (ADUN) Batu Kawa enggau Pending kala mantaika penanggul tu maya Aum Kunsil Nengeri (DUN) bulan November 2013.
“Nya alai, aku nyadang ijinsi tu ngerubuh Taman Mini Satok ke nadai mai penguntung ngagai mensia mayuh, lalu ngaga sebuah Palan Bedaja dua ringkat ba palan Taman Mini Satok nya, ungkup orang bedaja Satok enggau sida ke bejual ikan terubuk.
“Lalu udah nya ngaga perabung ba tengah-tengah jalai dalam pasar Satok baka ke ba Petaling Street ngambika ngelantangka orang bedaja di Pasar Minggu Satok,” ku iya.
Ku Aziz, enti amat Perintah deka mantu dagang komuniti Melayu, sida iya patut ngemanahka agi palan alai bedagang di Satok laban nya entara palan (benteng) ke majak punas ungkup komuniti Melayu iya nya orang dagang ba nengeri Kuching lalu ukai enggau chara mindahka sida iya ngagai luar sitak nengeri.
“Ngarapka sida iya ulih mutarka pekara tu enggau jampat sebedau mayuh agi pengerugi,” ku iya.