Anda di sini

Penyelai adat enggau main asal patut dijaga, dikemerat

Advertisement

Tuju pekara tu dikena meransang semengat 1Malaysia

SIBU: Adat enggau main asal ke nyelai dikereja ninting kali musin pengerami patut dijaga meruan.

Kaban Kunsil Nengeri (ADUN) Nangka Dr Annuar Rapa’ee madah, tuju pekara tu dikena meransang semengat 1Malaysia ke bisi dipeda ngambika terus negapka penyerakup enggau pengelantang kelebih agi ba nengeri tu.

Iya madah, adat ke nyelai tu dikearap ulih ngempuruka rayat ari penatai asal enggau jalai pengarap ke bebida.

“Tu endang sebengkah utai ke chukup nyelai iya nya bansa China, Melayu enggau Iban bela begulai ngintu genap pengerami ke bisi disambut.

“Utai tu tentu deka nempa peneleba enggau kerejasama entara sida enggau pangan diri taja bebida penatai ba seiti menua ke besai,” ku Dr Annuar.

Iya madah munyi nya lebuh bejadi Pengerami Ngiling Bidai ke diatur  ba Rumah Panjai Tuai Rumah Enteri Batu 11 1/2 Jalai Oya.

Rambau pengerami nya, iya bisi ngelalau bala nembiak rebak baru ngambika seruran ngiga jalai dikena ngetanka penyelai adat awakka enda mudah lenyau.

“Endang amat, kitai ulih ngintu pengerami enggau chara moden, Tang nama aja adat enggau main asal ke dipejalaika kitai jam pengerami enda patut ditinggal tauka dibuai,” ku iya.

Berebak enggau nya, bisi 28 buah rumah panjai ba sitak DUN Nangka sama bisi enggau nyambut pengerami nya.

Advertisement