SARATOK: Lebih kurang 20 iku rayat ti menggi tanah ngerimbai dua anak sungai iya nya Sungai Teras enggau Sungai Buluh, ditu madahka rugi besai iya nya manggai bepuluh ribu ringgit.
Nitihka penerang sida, kebuah pengerugi nyadi berindik ari pengawa nambahka peninggi tekat sungai ke digaga raban Loji Ai Beresi ba Lichok, kenyau taun siti ke udah.
Seiku ari sida ke serebana, Sangkan Melina, 47, madah, utai ke nyadi nya ngujungka bepuluh utai tanah sida nyengkaum pun buah, kelapa sawit, getah, pun engkabang enggau utai tanam ke bukai rayat ba menua nya mati magang ampuh laban ai kenyau ari pengawa nya dipejalaika sida.
“Pekara ke nyadi balat ngasaka ati kami jam ke diatu laban nadai orang kiruhka penusah ke nuntung kami, taja pan kompelin bisi digaga ngagai orang ke besangkut paut.
“Nadai seiku pan orang datai beratika penusah ke nuntung kami tu. Lebuh raban kami datai ngelawa raban orang ke besangkut paut, sida suah mayuh kedalih enggau kami baka ke enggai kiruh enggau pekara ke dikereja sida.
“Lebuh kami ngenataika pekara tu ba Saratok, sida ngasuh kami ngeripot ngagai opis sida ba Betong. Tang lebuh diripot ngagai Betong, raban sida nya ngasuh kami ngaga ripot ba Saratok,” ku Sangkan penuh enggau asai asa, maya dirandau pemberita, ensana.
Loji Ai Beresi ba Lichok berengkah dibuka kenyau ari taun 2006 nya bepalan ba Nanga Lichok iya pegai pelilih menua Saratok lalu ai nya diambi ari Sungai Seblak.
Loji nya ulih nambahka penyampau ai beresi ke dipansut iya nya ari 12 MLD sehari ulih nambah ngagai 24 MLD ungkup rayat ti tebal agi diau ba kandang menua Roban, Nyabor, Grigat, Sessang, Empelam, Kabong sereta ba sepemanjai jalai Nyabor-Selalang enggau Pasar Saratok.
Nitihka penerang Sangkan, pekara ke sebaka udah suah nyadi, nyentukka sida kusut penemu berundingka chara dikena mutarka penanggul nya.
“Ba penemu kami, pengawa nambahka peninggi tekat nya dikereja laban penyampau ai ke diguna majak mayuh kelebih agi rambau musin kemarau ba taun siti ke udah.
“Pengawa nambahka peninggi tekat nya digaga enggau chara ngempang pejalai ai ke ngelumpa ngena papan kayu belian kira peninggi lebih kurang empat kaki,” ku Sangkan.
Nangkan ke nya, nitihka penerang Linggir Ngadi, 70, madah, penanggul nya ukai semina ngujungka utai tanam sida ambis rusak tang mega ngujungka jalai ke sauh ditenggah sida ngelawa kebun diri empu pan udah ampuh laban ai.
“Utai ke nyadi tu ngujungka rayat tepasa ngaga perau dikena ngelayang jalai laban penalam ai nyau maras punggung ba hari biasa, kadang-kadang lebuh musin landas nyau ai nyau nuntung pala. Pekara tu ngenusahka rayat deka ngemansutka asil utai tanam sida.
“Enti ngelama tu,takah ai ngelumpa ari tekat asal lebih kurang sekilometer aja ari tebing Sungai Seblak. Tang kenyau peninggi tekat udah ditambah ngujungka ai ngelumpa ngagai dua kilometer tungga kulu sungai lalu penyauh ari tebing sepiak ngagai tebing sepiak kira setengah kilometer.
“Utai tu nyau ngelui ari tikas kandang asal bekau projek loji nya,”ku Linggir.
Linggir madah, tebal agi tanah rayat ke dipangka penusah nya bisi ngembuan geran.
“Utai tu ngujungka tanah kami ‘mata’ pia aja. Enti suba tanah tu ami, tang diatu, palan nya nyau ampuh ai,” ku Linggir enggau ati sinu.
Berebak enggau nya, tebal agi rayat ke sama dituntung penusah nya minta lalu ngarapla raban orang ke besangkut puat ulih berundingka chara dikena mutarka penanggul sida.
Sida madah, ambis nadai pan raban orang ke besangkut paut mampas semua utai tanam sida ke udah rusak ketegal ari penusah ke balat meri pengerugi ngagai sida.