Anda di sini

Pengawa ngaga Rumah Dayak nganti pala tanah

Advertisement

Dikarang Judan Bungap //

Naka ke diatu gerempung tu agi nganti surat tanah nya dikeluarka Opis Tanah enggau Survei

SIBU: Pengawa ngaga Rumah Dayak Sibu semina ulih berengkah enti bisi surat pala tanah.

Chairman Gerempung Bansa Dayak Sarawak (SDNU) Pampang Sibu Tengku Gruna madah, sida mengkang nganti surat nya dipansutka Opis Tanah enggau Survei (JTS).

“Kitai enda ulih nyebut sebarang pekara bekaul enggau Rumah Dayak Sibu laban nyentuk ke diatu surat pala tanah nya empai diberi,” pia ku iya madah.

Iya mantaika jaku nya maya nyadi chairman Aum Besai SDNU Pampang Sibu ba sebengkah hotel ditu, ensana.

Sama bisi datai ngulu aum tu iya nya Sapit Chairman SDNU Pampang Sibu Barieng Balai enggau Sekretari SDNU Pampang Sibu Sambang Jalak.

Ketegal pekara nya, ku iya, iya empu udah betemu enggau Sekretari Mendam Opis Menteri Pengatur Pemansang Pengeraja Asal enggau Rampa Menua Datu Sudarsono Osman bulan nyin tadi.

“Aku betemu enggau iya ngambika tau ngelengkaska agi pala tanah diberi dikena ngaga Rumah Dayak Sibu,” ku iya ti mega Sekretari Politik Kepala Menteri.

Tengku madah, suba SDNU Pampang Sibu bisi Rumah Temuai besepiak enggau Sepital Lau King Howe.

Udah nya ku iya, Rumah Temuai nya diambi perintah lalu diganti enggau sebidang tanah lima ikar sepiak enggau Penyangkai Bilun Lama Sibu.

“Udah nya, tanah nya diambi Library Nengeri lalu ditukar baru enggau sebidang tanah sepiak Stadium Tun Zaidi enggau Opis Bomba Sungai Merah.

“Kitai deka ngaga Rumah Dayak Sibu ba tanah tu tang kitai empai bisi pala tanah,” ku iya nandu.

Berebak enggau tu mega, Tengku madah, SDNU Pampang Sibu diatu udah bisi 1,000 iku kaban ari 13 pati.

“Udah tu, SDNU Pampang Sibu deka bisi pati baru iya nya Unit Batu 16,” ku iya nerangka.

Ba pekara bukai, SDNU Pampang Sibu deka ngatur Pengerami Ngiling Bidai kena 5 Julai tu ba RH Hotel pukul 7 lemai lalu disadang deka dipenyadika Sapit Kepala Menteri Datuk Patinggi Tan Sri Alfred Jabu Numpang.

Advertisement