Anda di sini

Pemintar enggau pemandai patut digembar enggau pemanah ulah

Advertisement

SRI AMAN: Sekula chukup besai tanggungjawap dalam nyalai juluk menua kelimpah nyadi palan ngagai bala nembiak ngulihka pemandai enggau endur nempa mayuh agi rayat mujur sereta ulih nulung ngemansangka agenda menua.

“Taja pia, pengawa tu patut nerima sukung enggau kerejasama ari semua orang kelebih agi ari bala pengajar, Gerempung Apai Indai enggau Pengajar (PIBG) sereta ari rayat mayuh ke semak,” ku Kaban Parlimen Sri Aman, Masir Kujat.

Iya madah, ba jeman diatu berindik ari pemansang perengka teknologi pemadah enggau penyambung (ICT) ngujungka ubah dunya dikumbai ‘Dunya Nadai Agi Beentara’.

“Dikena ngasaika pemujur enggau ubah dunya ke majak mayuh pemar tu, kitai patut besedia enggau nyikap pelajar enggau mayuh penemu, pengelandik sereta ngambika sida terus mereti dikena nambahka penyampau raban nembiak ke ulih napi ubah enggau pemar,” ku iya.

Iya madah munyi nya lebuh bejadi Aum Besai Gerempung Apai Indai enggau Pengajar  (PIBG) ke-17 sereta Aum Besai Gerempung Alumni, Sekula Sekondari (SMK) Simanggang bepalan ba Dewan Rafflesia sekula nya ditu, apin lama ke udah.

Nangkan ke nya, tuju pekara nya dikena negapka pemayuh penemu enggau pengelandik bejaku kelebih agi ba Jaku Inggeris sereta nekanka mayuh bengkah pengelandik ba raban pelajar ke nyadi agenda besai sesebengkah sekula.

Taja pia, ku iya pemintar enggau pemandai aja enda chukup nyema ulah enda manah. Ulah pendiau meg ke pemadu beguna patut dikembuan raban nembiak dikena napi pengidup ke mayuh penguji tu.

Ku tandu Masir, pengawa ngemansangka modal mensia tu patut diatur enggau betul sereta begunaka kerejasama. Semua penau enggau pengelandik bala pelajar ulih dikemansang enggau meruan.

“Kitai enggai meda orang semina landik ba bidang akademik aja, tang mega patut sebela enggau pemansang bukai ari sukut tubuh, runding, penemu enggau ngembuan ulah ke chukup manah, sayauka menua sereta enda ngerunding diri empu aja lalu ulih bejalaika tanggungjawap ngagai mensia mayuh.

“Pengawa tu setipak enggau dua ari enam batang pekara Pelin Besai Pemansang Pelajar iya nya nempa menua enggau bansa sereta ngemansangka modal mensia.

“PIPP endang pantar ke pemadu manah nyadi tungkat nyapai juluk perintah awakka ulih nyapai status menua maju taun 2020,” ku padah iya nyemetak.

Nya alai, nengah pemisi kerejasama entara raban pengereja pengawa ba sekula enggau raban PIBG, tentu ulih ngemansangka sekula mujur ba sukut  akademik enggau kokurikulum. Pemanah kaul tu mega deka meri penguntung ngagai bala pelajar,” ku  tandu iya.

Sama bisi datai rambau pengawa nya, Penulung Kanan Sekula, Engkamat Slapok, Direktor Program Latih Ke Menua Enggau Bansa (PLKN) Zon Sarawak, Mohd Melintang Abdullah, Chairman Alumni, Francis Brayang, Tuai Dipebasa PIBG, Jelaini Satin sereta bala pngajar senir ke bukai.

Maya nya mega, Masir bisi nyadaka agih belanja RM 3,000 ngagar raban pengajar sekula nya dikena sida meli jersi tim sekula enggau RM 5,000 diberi ngagai PIBG sekula.

Berebak enggau nya, Masir mega bisi nyuaka upah ngagai 20 iku pelajar ke udah nyulut dalam pemutus peresa perintah 2013.

Advertisement