SRI AMAN: Bidang pelajar endang pugu pemansang enggau pekara besai ngagai menua, pia ku Menteri Muda Pemansang Menua Pesisir enggau Pengawa Berumah, Datuk Francis Harden Hollis.
Iya madah, jeman ke diatu, dikena besemekih dalam pengidup genap iku peranak menua tu patut ngembuan tikas pelajar ke tinggi ngambika setipak enggau standard dunya sereta ulih besemekih sebaka enggau sapa-sapa orang.
“Nya alai, dikena nentuka anak kitai, rayat kitai datai ba tikas nya, penemu enggau pemansang pelajar patut ditekan ninting taun,” ku iya.
Harden ti mega nyadi Kaban Kunsil Nengeri (ADUN) Simanggang madah munyi nya nengah teks jau iya ke dibacha Walikota Opis Pelilih Menua Sri Aman (MDSA), Richard Tawan Sedu rambau nutup Program Lumba enggau Main nyerumba Hari Pengajar 2014 diatur Gerempung Bala Pengajar KEMAS Pelilih Sri Aman bepalan ba Dewan Kawad, Temudok Kem ditu, apin lama ke udah.
Iya madah, penyulut enggau pemujur ke dijapai bala pelajar ukai utai ke datai kediri empu enda nadai iring embing enggau ajar ari bala pengajar. Pemendar pengawa enggau pengeransing bala pengajar enda tau dikumbai bidang pengawa aja laban pengawa sida ngelui ari nya.
“Ngagai kitai orang luar ke nadai agi diau ba sekula tauka apai indai, pengajar endang pengajar, tang kebendar iya, tanggung pengawa sida ukai semina ngajar, sida meh orang ke ngajar bala anak sentang bemacham pengelandik baka chara begulai, berandau, ulah pendiau sereta gaya idup ke mereti ngambika bala anak ulih ngidupka diri maya udah tembu belajar ba sekula dudi hari,”ku iya.
Berebak enggau nya, ku iya, pengawa bala pengajar enggau pengereja pengawa ba sekula mega tau nadai meri bekau enti sema baka apai indai semina nejuka tanggungjawap ngajar bala anak ngagai pengajar aja laban penemu, pengelandik enggau peneleba ke ulih sida ba sekula atut ditegapka agi ari bala apai indai enggau gaya pendiau rumah sida.
“Kebendar iya, bala apai indai ngembuan tanggungjawap ke diri empu dalam ngajar bala anak sida enggau nentuka bala anak sida nyilakka baru utai pelajar sida maya ba rumah, nentuka baka anak chukup perengka dikena belajar, sereta lantang dalam semua sukut pengidup.
“ Bala anak ke bulih pengasih, penyayau enggau perengka guna ke chukup ukai semina ulih nyapai pemujur dalam pengidup tang sida mega, enda mudah tepejuh enggau orang ngereja pekara ke menuku baka gila dadah, gam, lumba enda beradat enggau mayuh agi penyalah sosial ke bukai,”ku iya.
Sama bisi datai ba pengerami nya,Ketuai Kompeni C, Batalion 10, Pasukan Gerakan Am (PGA), Sri Aman, ASP Yusof Baki, Kepala Pengajar Sekula Primari (SK) Temudok, Bohan Saha, Sapit Chairman MDSA, Kunsilor Sawing Sumar, Chairman Gerempung Helen Edward Brandah sereta bala pengajar Tabika KEMAS ke bukai.