MIRI: Mayuh penguntung deka diulih nyema indai tunggal terus nyukung enggau meri kerejasama ngagai perintah Barisan Nasional (BN), pia ku Presiden Gerempung Indai Tunggal Sarawak, Salmah Ibrahim.
Iya madah, mayuh program ke deka dipejalaika perintah bala ngemeratka peminta guna bala indai tunggal ba serata menua.
“Mayuh program ke udah diperambu perintah dikena nulung raban sida tu lalu ngarapka bala indai tunggal terus nyukung perintah ke udah mayuh nulung sida,” ku iya rambau Aum Dua Taun Sekali Gerempung Indai Tunggal Miri kemari.
Salmah madah, indai tunggal mega bisi nulung ngemansang enggau ngenegapka politik lalu nadai ngasut alit ati enti raban sida tu ulih besemekih dalam mayuh bidang.
Nangkan ke nya, iya madah kaban gerempung patut ngubah runding enggau juluk dikena napi pemar dunya ke maya hari dalam bidang-bidang ke setipak enggau pengelandik sida.
“Kami deka meda mayuh agi raban indai tunggal ke agi biak masuk pengawa dagang enggau insutri jelan pemesai dikena nyungkak penatai pemisi sida,”ku iya.
Salmah madah, 20 peratus indai tunggal nadai ngambi bagi dalam dagang mit, salon, kedai bejait enggau ngaga kuih, penyampau nya majak nambah ninting taun.
Lebuh beratika gaya nya, iya madah perintah deka nyediaka mayuh bengkah perengka guna dikena nentuka raban sida nya nyereta industri jelan pemesai.
Ba pemansang bukai, gerempung nya ku iya udah ngaduka diri empu dua taska iya nya Taska Qaseh Laila 1Malaysia’ Kuching.
“Sukung enggau bantu ari perintah chukup beguna amat dikena nulung bala indai tunggal ba Sarawak lalu kami ngarapka raban korporat bukai bela ulih nulung sida,” ku iya.
Berebak enggau nya, Horry Bujang udah dipilih nyadi Chairman Gerempung Indai Tunggal Miri lalu Nur Khairunisa Jumat dichiri nyadi Sekretari.
Udah nya, Amedah Luntar dichiri nyadi tuai akaun lalu kaban komiti bukai ke udah dichiri iya nya Suraya Fauzi, Parry Randi, Radah Bujang enggau Fatimah Mumin.