KUCHING: Undang-undang bekaul enggau Tanah Adat Bansa Asal (NCR) ti deka dibantai maya Aum Kunsil Nengeri bulan November tu ila, dikearap ulih dikemendar diubah lalu tau dikena menua tu lebih agi ba sida ke bisi tanah NCR nyadi penyereta aktif dikena ngangkatka ekonomi mensia mayuh (Bumiputera) ba abad ke-21 tu.
Menteri Pemansang Tanah Tan Sri Dr James Masing madah berindik ari kes NCR ti dibai bechara ngagai kot bedau lama tu tadi bekaul enggau Bisi anak Jenggot enggau Perintah Menua Sarawak, komuniti Dayak pengudah pemutus nya beratika bisi pemerat ngubah Undang-undang Orang Asal (Native) enggau Kod Tanah Menua, ke ulih ngangkatka ekonomi orang asal ke ngempu tanah NCR nyadi penyerta dalam abad ke-21 tu.
Ba timbal Masing ba jaku Kepala Menteri Tan Sri Adenan Satem ke bisi nyebut pasal Undang-Undang Tanah NCR diperambu deka dibantaika maya Aum Kunsil Nengeri tu ila (bulan November 2014), madahka Adenan nemu pemerat lalu nyukung pemerat ngubah kod tanah, kelimpah ari ngelalau komuniti orang asal betatikaka undang-undang orang asal diatu setipak enggau ekonomi kemaya hari tu.
“Orang Asal enggau Bumiputera Sarawak seruran beterima kasih ngagai Tan Sri Adenan ke pemerat iya ngaga pekara tu nyadi siti pemerat ba tanah NCR, kelebih agi dalam sukut ekonomi nengah (commodity of sale), udah isu tanah NCR tu dibantaika.
“Pemerat undang-undang tanah NCR ke patut diubah tu deka nyadi ‘legasi’ dalam Perintah Adenan,” ku iya.
Hari Lima tu tadi maya dikerandau dalam program ‘Khas Bersama’ beserimbai enggau 100 hari pangku pengawa Adenan nyadi Kepala Menteri Sarawak di Auditorium RTM, iya madah Perintah Menua Sarawak deka mantaika Rang Undang-undang bekaul enggau hak adat NCR maya Aum Kunsil Nengeri bulan Novemver tu ila.
Ku iya, udah Rang Undang- undang tu dikemendarka dalam Kunsil Nengeri, komuniti Bumiputera ulih nyual tanah NCR sida iya ke nadai pala tanah nya ngagai Bumiputera bukai.
Iya madah, atur tu deka meri penguntung ngagai tanah NCR laban atur kediatu pengawa bejualka tanah semina ulih digaga entara orang ke sama rumah panjai tauka genturung pendiau, enggau rega ke baruh ari penyampau makit (market value).
Ku Adenan, sebedau tu tanah NCR dikena ngadu pengawa betanam betupi, bekebun lalu semina dikena ulih Bumiputera ba siti-siti genturung pendiau aja.
Nya kebuah, ku iya penguntung tanah enti dijual enda mayuh laban ulih dijual enggau diri sebilik aja, ku Adenan.
“Kemaya hari tu, tanah ukai semina dikena bekebun aja tang mega dikena ngaga rumah komersil, sereta ekara bukai, ken gaga tanah nya berega endar,” ku iya.