Raban bansa Iban diperansang nitihka singkang seraya neladan pemujur orang bukai
SIBU: Raban bansa Dayak diperansang nitihka singkang orang bukai ke udah mujur dalam pengidup.
Chairman Kaunsil Penyanding Penemu 1Malaysia Sarawak, Datuk Joseph Salang madah, seiku bansa kitai ti tau dititihka singkang iya nya Tuai Rumah Simon Ason ari Ulu Sungai Salim ditu.
“Iya agi biak lalu orang bukai tau nitihka singkang iya ke udah mujur nyadi orang dagang.
“Kitai semua nemu ukai semua orang ti malutka diri ba pengawa dagang teulihka pemujur,” pia ku iya lebuh bejadika pengerami mangkung
tiang ba bungalo Tuai Rumah Simon Ason di Ulu Sungai Salim kena Hari Enam nyin tadi.
Bela bisi ngulu pengerami nya, Residen Sibu, Sim Kok Kee, Pengulu Jerampang Ratoh enggau Tukang Wang Balai Dagang enggau Industri Dayak (DCCI), Allen Keripin Nangkai.
Salang ke mega presiden DCCI madah, kita enda tau enda rinduka pengawa ke dikereja baka kita rinduka petara.
“Nya alai enti kitai pengajar, nyadi meh pengajar chunto. Enti kitai gawa nyadi kerani, nyadi meh kerani chunto,” pia ku iya.
Ba pekara bukai, iya minta bala tuai rumah enggau peranak rumah panjai nya sama berundingka chara dikena nyungkak tikas pengidup sida.
Lebuh ke bejaku dulu ari nya, Sim madahka iya nguji nyaup ngulihka belanja dikena ngaga gelanggang endur main futsal baka ke dipinta peranak di Ulu Salim.