Dikarang Jacqueline David //
Enti peminta nya disakal sekeda kaban dalam BN dia parti nya enda dikemendar masuk dalam gempung
KUCHING: Parti Tenaga Rakyat Sarawak (TERAS) enda patut dipasuk ke dalam komponen Barisan Nasional (BN) enti konsensus 13 parti komponen BN enda setujuka parti nya masuk dalam kaul BN.
Presiden Parti Rakyat Sarawak (PRS) ti mega Menteri Pemansang Tanah Sarawak, Tan Sri Dr James Masing madah, ba renggat menua Sarawak aja, parti komponen BN ke diatu bisi empat, Parti Pesaka Bumiputera Bersatu (PBB), Parti Rakyat Sarawak (PRS), Parti Demokratik Progresif Sarawak (SPDP) enggau Parti Sa’ati Rakyat Sarawak (SUPP) udah chukup mayuh lalu enda ibuh ngemasukka sebuah agi parti ke dalam BN.
“Naka ke diatu, 3 buah parti komponen BN nengeri enda setuju TERAS dipasuk ke dalam BN, iya nya PRS, SPDP enggau SUPP. Bepelasarka
penetap, sebarang parti baru ke deka masuk dalam komponen BN begunaka 100 peratus pemendar tauka konsensus, nya baru TERAS ulih masuk BN.
“Nya alai, kediatu peminta TERAS masuk BN dikira jalai mati sebedau sida iya belabuh,” ku Masing madah nengah pesan jaku pandak iya nuju Utusan Borneo ditu, Hari Enam tu tadi.
Naka ke diatu, penyampau kerusi parti komponen BN di Sarawak, ba renggat Kunsil Nengeri (DUN), iya nya PBB (35), PRS (9), SUPP (19) enggau SPDP (8).
Nya alai ku Masing, besemaka maya pengawa Bepilih Besai Nengeri enda lama agi, enti TERAS deka betengali alan enggau parti komponen BN bukai, sida iya deka ngena kelai sida iya empu, TERAS vs SUPP vs SPDP.
“Enti nitihka formula BN Plus (+), barang sapa ke menang ulih masuk BN. Tu ke nyadi formula BN Plus dalam taun 1983 kelia: PBDS vs SNAP,” ku iya.
Ex-presiden SPDP Tan Sri William Mawan Ikom enggau ex-chairman SUPP pampang Sibu, Dato Sri Wong Soon Koh pansut ari parti sida lalu begempung enggau TERAS, kena 15 Mei tu tadi, Mawan nguluka kaban TERAS bukai ngaga aum media di Bilik Media, Kunsil Nengeri.
Mawan enggau Wong ka sama Menteri Kanan Perintah Menua Sarawak, iya nya Menteri Pemansang Rama enggau Menteri Wang Kedua. Mawan mega mangku pengawa nyadi Kaban Parlimen Saratok.
TERAS ke diatu bisi sebelas ADUN enggau seiku MP, ke dipeda, parti kedua pemadu besai di Sarawak kelimpah ari PBB.
Mawan maya ngaga aum media 15 Mei tu tadi, ngenyitka semua pemberita enggau pemutus ke dipadah, iya ukai ‘kapten’ ke merejuk ari kapal tang seiku ketuai betapi enggau penyarut ke alai kaban SPDP ngelaban iya.
Wong madahka diri, iya nadai jalai bukai tang dipekal pansut ari SUPP.
Dalam TERAS mega nyengkaum seiku ADUN ke kala enggau Parti Sarawak Wokers Party (SWP) George Lagong ke nyad ADUN Pelagus, ke ditemu kerusi asal Pelagus, diempu PRS ari suba.
Berindik ari nya, PRS kala madahka sida iya enda lantang ati enggau pengawa Lagong ke masuk TERAS, laban pemerat ke diatu, kerusi Pelagus, maya pengawa
Bepilih Besai Nengeri (PRN) ti deka datai tu ila, sekalika meruan dipenggi ke PRS tauka enda.
Semua pemutus nya, bepanggai ba TERAS enti iya dipasuk ke dalam BN tauka enda, lalu pekara ti nyadi pemerat, bakani mutarka kerusi PRS, SPDP enggau SUPP, enti TERAS masuk dalam komponen BN?