Anda di sini

Seraya ngabang Ugak nyuaka ungkup belanja MRP

Advertisement

KAPIT: Kaban Parlimen Ulu Rajang, Wilson Ugak Kumbong maya Hari Gawai Dayak tu tadi udah ngabang ba sebelah sitak Baleh.

Sebuah ari rumah panjai ke bisi endur iya ngabang iya nya Rumah Liok di Nanga Sepanto Mujong.

Berebak enggau nya iya lalu ngungkupka belanja Projek Mit Pemansang Menua Pesisir (MRP) RM125,000 ngagai Komiti Pemansang enggau Pengelikun Genturung Pendiau (JKKK) Rumah Liok.

Nengah geran ke diberi iya nya, RM100,000 deka dikena ngaga jematan besi meraka sebatang sungai kena nyambung rumah panjai nya ngagai tanah seberai, RM20,000 dikena peranak rumah panjai nya nyeruri atap rumah lalu RM5,000 agi diungkup ngagai Biro Indu rumah panjai nya ngambika bisi dikena sida bejalai pengawa sepemanjai taun tu.

Lebuh ke diberi awak bejaku ngenataika pesan Hari Gawai, Ugak ngelalau peranak rumah panjai nya anang berambis belanja ngintu Hari Gawai.

Iya mega ngelalau bala apai indai naruh duit ungkup pelajar anak sida laban nya meh reta ke pemadu berega.

Lebuh ke ngenang pasal Hari Gawai, iya madahka pengerami nya ulih nyaup nyerakupka raban Dayak, laban maya nya meh sida ke gawa di nengeri bisi mulaika diri ngintu lalu ngintu Gawai begulai enggau diri sebilik tauka serumah.

Lebuh ke ngabang nya, Ugak disempulang bini iya Leyta Kupa, seiku pemesai ari Opis Pemansang Rama, Rata Tanggai, pemesai ari Opis Betanam Betupi (Seksyen Berikan) Rumpang Gumbang, pengari bukai ari sekeda opis perintah enggau bala ketuai raban bansa.

Advertisement