KAPIT: Kaban Kaunsil Besai PRS, Dato’ Kristoffer Nyuak empai lama udah nyambut pengabang beserimbai enggau Hari Gawai Dayak di rumah iya ba Sakum, KM-5 Jalai Selirik ke digulu mensia mayuh ke bisi ba kandang menua Kapit.
Dato’ Kristoffer Nyuak berengkah nyambut bala pengabang kena 1 enggau 2 Jun, ke alai bala kaban belayan, bakih, pengereja pengawa perintah, bala ketuai raban bansa enggau mensia mayuh bukai sama bela bis datai ngabang ngagai rumah iya maya nya.
Sekeda bala ti ngawakka diri ngabang ngagai iya nyengkaum Chairman Balai Dagang China, Dato’ Yong Hua Sying, Chairman SADIA Kapit, Edward Manggah, Chairlady Serakup Indu China Kapit, Wong Kie Ing, presiden Kelab Lions, Tiong Ping, Chairman Komiti Pengelantang Rama Methodist Kapit Ting King Yiing, Pastor Yu Ming Puo, Ketuai Genturung Pendiau Abang Hamzah Bolhassan enggau Kapitan Yong Thu Fook.