S’wak aja begunaka RM12 bilion dikena ngemujurka juluk nya
KUCHING: Perintah besai udah setuju enggau perambu perintah nengeri ke bejalaika pengawa ngaga Jalai Besai Pan Borneo enti Bajet Pemansang Negeri bisi laluh.
Menteri Kereja Raya Datuk Fadillah Yusof (gambar) madah, laban menua Sarawak chukup besai nyangka enda semua belaja ulih diberi dikena ngaga jalai besai nya laban agi bisi infrastruktur bukai ke patut digaga.
“Perintah Sarawak udah bejaku lalu berandau ba renggat Komiti Ekonomi bekaul enggau peminta belanja nya lalu sida nadai nyakal kitai bejalaika pemansang ba nengeri tu kelebih agi bekaul enggau Jalai Besai Pan Borneo.
“Nya alai, perintah nengeri udah madah nyema deka neruska projek Pan Borneo utai nya ulih dipejalai nyema agih belanja ke diatu bisi laluh.
“Reti nya, dalam agih belanja ninting taun Sarawak, kitai patut bulih agih belanja ke ngelui ari utai ke diguna ba tikas nengeri ngambika enda ngerampit agih belanja ninting taun ungkup pemansang kitai.
“Lalu berita manah iya, Menteri Besai udah setuju meri agih belanja dikena nembuka Jalai Besai Pan Borneo tu, ku tandu iya.
Iya madah munyi nya lebuh dirandau pemberita pengudah bejadi Pekit Main Takraw Mangkuk Datuk Fadillah Yusof bepalan ba Supermakit Hills ditu kemari.
Fadillah madah, dipelabaka Jalai Besai Pan Borneo ba Sarawak enggau Sabah begunaka agih belanja tambah kira RM22 bilion baru ulih tembu, lalu menua Sarawak aja begunaka RM12 bilion dikena ngemujurka juluk nya.
“Agih belanja tambah ungkup Jalai Besai Pan Borneo tu deka dipasuk dalam bajet ke deka datai,” ku iya.
Rambau Aum Kunsil Nengeri (DUN) tu tadi, Kepala Menteri Tan Sri Datuk Amar Adenan Satem madah, pengawa ngagai Jalai Besai Pan Borneo meseti diengkah ba rintai atas Bajet Pemansang Nengeri.
Maya nya mega, iya madah deka mai pekara nya ngagai Menteri Besai Datuk Seri Najib Tun Razak awakka diperunding lalu pekara nya udah bulih timbal ari Najib.
Ba pemansang bukai, lebuh ditanya bekaul enggau agih belanja jalai perintah besai ungkup nengeri tu ba taun 2014, Fadillah madahka ungkup projek nyeruri bajet ke udah dikemendar iya nya RM4 juta.
“Tu nyengkaum dikena nyeruri Jalai Sibu-Bintulu enggau sebuah agi jalai ke besambung entara menua Kuching enggau Serian (iya ke agi bedau bisi empat lurung).
“Tender ungkup projek tu deka dibuka taun tu lalu kami ngarapka projek tu ulih berengkah dipejalai taun dudi,” ku iya.