Anda di sini

Peranak Nanga Uyau minta saup ngemanahka jalai

Advertisement

Bisi dua buah sekula enggau sepuluh buah rumah panjai bukai ke sama bela betengahka jalai nya ninting hari

KUCHING: Jalai kompeni kayu batang ari simpang Sebeliau nuju ngagai  rumah panjai Nanga Uyau di Lubok Antu udah lama diintu enggau manah ngelui tiga taun, taja pan semina seiti jalai nya aja ti nyadi penyambung peranak menua nya ngelama tu nurun ke sekula tauka ke pasar.

Taja pan bisi sungai ke tau dikena nyadi jalai perengka pengangkut, tang ketegal pengawa berimbaka kampung ti dipejalaika ba kandang menua nya, sida mar ngiga kayu ke besai ti ulih digagaka bangkung.

Enggai enda pan peranak menua nya enti mindah betengahka jai ke balat endar rusak kelebih agi enti maya pengujan, jalai nya luchak sereta lichin.

Ku Tuai Rumah Nanga Uyau, Utum Imu, 52, jalai nya nadai kala dikemanahka ngelama tu. Gaya jalai nya mega ngenusahka peranak menua ti betengahka jalai nya ninting hari.

Iya empu mega suah ngasai betapi enggau pemar lebuh kerita 4WD iya rusak ba tengah jalai ti ngujungka iya, bini iya enggau bala penumpang bukai bemalam ba jalai nya nyentuk ke sida ngiga bantu pagi hari ti nangkanka nya.

“Aku arapka perintah berunding meri projek tauka ungkup belanja kena ngemanahka jalai nya. Pemadu nadai pan sida nyaup nampal lubang tauka tanah ke luchak sereta lichin ngambika mudah ditengah kami enggau orang bukai,” pia ku iya lebuh ke berandau enggau pemberita apin lama ke udah ba rumah panjai Nanga Uyau.

Tambah mega, semina jalai nya aja ke ditengah sida iya beranjung anak ke sekula, ke pasar bebeli barang tauka maya ke bisi penusah ngenyit .

Seiku peranak menua nya, Rumpang Nyanggau, 52, madah pengawa ngemanahka jalai nya besai  amat reti ba iya laban iya enggau anak iyabetapi enggau pemar lebuh ti mulaika diri ngintu Hari Gawai di menua, tambah mega iya agi pedis belakang ketegal bebadi ba jalai alun di Bintulu beberapa bulan sebedau gawai.

Ajon Sigai Son, 63, mega nusui di betapi enggau pemar lebuh ke pulai gawai tu tadi laban kerita sida sebilik suah endar lekat sepemanjai jalai nya ti ngujungka sida nyau sabung lemai sangkai ba  rumah panjai nya.

“Aku arapka perintah nyaup kami ngemanahka jalai nya, sekalika dibelakin tauka dianchauka batu,” ku Ajon.

Rh. Nanga Uyau panjai 19 pintu, urung iya 31 kilometer penyauh ari simpang Sebeliau sereta begunaka timpuh ngelama tiga jam pejalai nepan kerita 4WD nengah jalai kayu batang nya.

Kelimpah ari Rh. Nanga Uyau, bisi lebih 10 buah agi rumah panjai sereta dua buah sekula primari ke sama bela betengahka jalai nya baka Nanga Bilik Antu, Telinting, Nanga Paoh, Nanga Matu, Batu Kemarau, Nanga Payau, Nanga Patoh, Nanga Uyau, Serubah, Nanga Ngemah, Nanga Jangin, Nanga Puloh enggau Nanga Menyebat. Dua buah sekula primari iya nya SK Nanga Menyebat enggau SK Ulu Lemanak.

Advertisement