KOTA SAMARAHAN: Universiti Malaysia Sarawak (UNIMAS) dikearapka ulih nyadika pelasar Vanessa Dica Edward Draman, 18, nambahka tikas pemerani diri kelebih agi maya begulai sereta bejaku ba mua mensia mayuh.
Vanessa ti ngambi Program Asasi Sains Fizikal ke beasal ari Genturung Pendiau Bayor Serian lebuh dikerandau mega madah, iya arapka juluk ati ke deka belajar sereta nyadi injinir kimia ulih dijapai ba UNIMAS.
“Sebedau tu, lebuh ke agi ba sekula sekondari aku seiku orang ti malu, enda mudah begulai enggau orang sereta nadai pemerani.
“Tang aku ngarapka ulih ngubah sereta nempa diri nyadi nyadi berani agi lebuh aku nampung pelajar ba UNIMAS kelimpah ari deka nyapai juluk ati deka nyadi injinir kimia,” ku Vanessa anak kedua ari tiga iku diri menyadi ti bulih 5A 4B ba peresa SPM 2013.
Nambahka nya, Hawa Ringkai, 18, ari Genturung Pendiau Spaoh Engkabang, Simunjan mega ngembuan juluk ke sebaka enggau nembiak bukai, iya nya deka ngulihka pemandai ngambi ulih ngubah pengidup menyana agi.
Hawa anak bunsu ari lima iku diri menyadi madahka UNIMAS pilih keterubah ari lapan universiti ke dipinta iya nengah UPU.
Belalauka pemujur dua iku menyadi ti udah mujur tikas pelajar tinggi, Hawa ngarapka ba UNIMAS iya teulihka pemutus peresa pemadu nyulut sereta ulih nampung ngagai ke tinggi agi.
“Aku besemaya sereta ngarapka diri empu ulih nyadi nembiak ti pemadu nyulut dalam program keterubah tu, sereta bulih CGPA 4.0.
“Laban aku anak orang bekebun bumai, apai indai aku bekebun lada, aku ngarapka pemujur tauka penyulut ba UNIMAS ulih ngubah pengidup kami sebilik ngambika meruan agi, nya alai aku deka bebendar ngulihka iya (pemandai),” ku Hawa ti bulih 6A 3B ba SPM 2013.
Kelimpah ari nya, Mohd Nur Areef Abidin, 18, ari Lumut, Perak lebuh ke ditanya nama kebuah milih UNIMAS, iya madah laban UNIMAS nyendiaka program sereta ungkus belanja ke mimit agi enti dibanding enggau universiti bukai.
Iya ti bejalai ngena tungkat ketegal bisi pemedis ba pala patung madah, nya ukai nyadika penanggul tiya nampung pelajar ba UNIMAS taja pan jauh ari menua asal.
“Aku milih UNIMAS laban universiti tu bisi nyendiaka bidang injinir enggau mekanikal, aku arapka ditu ulih nyapai juluk ati aku ke deka nyulut dalam bidang nya.
“Lalu penimpang sementara tu ukai nyadika kebuah aku enda ulih mujur sereta enda ulih ngatika diri,” ku Areef ti ngambi Program Asasi Sains Fizikal ba UNIMAS.
Vanessa, Hawa enggau Areef entara 758 iku nembiak baru Program Asasi Sains ti bisi ba Majlis Ikrar Pelajar Baharu (MIP) Minggu Aluan Pelajar PPPU Sesi 2014/2015 UNIMAS.
Pengerami nya digulu Sapit Mandal Canselor (Akademik & Antarabansa) UNIMAS Pror. Dr. Fatimah Abang ti ngarika Mandal Canselor Universiti Malaysia Sarawak (UNIMAS) Prof Dato Dr. Mohamad Kadim Suaidi enggau bala bukai.