PEDIS DIGIGA: Gambar lama (fail) tu diambi beberapa taun sebedau tu mandangka Ambie gaga ati bulih undang angkang pemulai iya ari nyala ba Sungai Mupong.
BINTANGOR: Kira lima taun sebedau tu, bala sida ke berikan ari Rumah Peter Minggat, Sungai Mupong Ulin lantang bendar ngulih ke undang lima enggau enam kilogram tauka lebih ari nya dalam sehari.
Enti ai ngena tauka endang munsin undang bala dia nyamai ngulihka bebelas kilogram dalam kandang sehari aja.
Ketegal nya, Sungai Mupong kala pengari rita disebut orang ari luar alai nginti ngulihka undang nyentuk ke dilawa sida ari menua bukai nyengkaum ari Sarikei, Sibu enggau Bintulu.
Tang diatu semua pengelebih ti nejuka bala menua nya berasai temegah ati udah jauh berubah bepun ari pengamu orang ari menua bukai ti deka muntang ngulihka undang enggau jalai senang tauka nyemetak agi disebut ngerachun undang.
Ambie Sikaran seiku ari bala rumah panjai nya maya dikerandau pengarang berita empai lama tu tadi madah, sida serumah diatu pedis bendar ngulihka undang baikka nyala tauka ngempang ketegal ulah orang menua bukai ke datai ngerachun ngagai menua sida.
“Kami serumah ngelala sapa bagi orang ke ngerachun tu.
“Taja kala dirara sida enggai mendingka jaku pungka berani ngerachun sebelah pendai kami,” pia ku iya madah.
Ku iya, pengawa berikan endang dikereja kenyau ari iki ini sida menya. Berikan endang batang jalai pengidup sida semenua nyengkaum orang rumah panjai ke bukai.
Mujah Juing, bela ari rumah panjai tu madahka sida serumah enda nemu agi baka ni pengujung pengidup jemah ila enti penusah nya majak nyadi.
Ku iya, sida agi bepanggai bendar ba pengawa berikan laban nadai tentu nyengala pengawa bukai ulih dikereja dikena ngidupka diri.
“Baka enggi aku agi mayuh amat anak besekula lalu bekenaka belanja ti besai nambahka agi rega barang diatu mega mar magang.
“Kami ditu jarang ngereja pengawa bukai dikena ngulihka penatai pemisi enti enda berikan,” pia ku iya madah.
Mujah mega madah, orang ngerachun sungai sida suah agi maya malam hari.
Kelimpah ari nya, iya madah sida serumah nangi bendar ke pengelikun diri nyema matau sungai maya malam hari irau ke orang ti ngerachun nya bebaika senapang.
Sida serumah andal amat opis ti bekaul ulih datai sekali dua matau sungai sida lebih agi maya malam hari ngambika ulih nangkap orang ti ngereja penyalah ngerachun nya lalu ngeletakka ukum ti berat agi.