SRI AMAN: Menteri Muda Pemansang Menua Pesisir enggau Pengawa Berumah Sarawak, Datuk Francis Harden Hollis madah, chalun Barisan Nasional (BN) sitak Kunsil Nengeri (DUN) Engkilili ungkup Pengawa Bepilih Kunsil Nengeri (PRN) dudi tu ila deka dichalunka Parti Sa’ati Rakyat Sarawak (SUPP) Tikas Indu Parti, ngambi dipesetujuka Kepala Menteri Sarawak enggau Menteri Besai menua Malaysia.
Ku iya, sitak Engkilili seiti ari penuduk ke diempu SUPP ke alai pengari rayat ba sitak nya Dr. Johnical Rayong Ngipa ti udah namaka diri ngagai Parti Tenaga Rakyat Sarawak (TEGAS) api lama ke udah.
Ku iya baru, SUPP Engkilili diatu benung ngiga bala chalun ti tau dikearap ngisi penuduk SUPP di Engkilili sebedau nama chalun nya dianjung ngagai Indu opis SUPP ngambika dipesetuju Kepala Menteri enggau Menteri Besai ila.
Iya mega madahka diri udah diberi Indu opis Parti SUPP tanggungpengawa nyaup SUPP Engkilili ngiga palan baru endur muka opis sereta ngelekatka pal baru ungkup SUPP Pampang Engkilili.
“ Kami udah nyuwa sebuah palan baru endur muka opis ke alai pengerami bejadika nya udah digulu Sekreteri Besai ari Indu Parti SUPP, Senator Profesor Dr. Sim Kui Hian kena 1 Jun tu tadi,” pia ku iya.
Harden ke mega Kaban Kunsi Nengeri (ADUN) Simanggang sereta Chairman SUPP Simanggang madah munyi nya lebuh ke berandau enggau Utusan Borneo ditu kemari.
Ku iya baru, nengah pengawa muka opis baru nya ulih ngemudahka meri servis ngagai rayat enggau pengundi ba sitak nya kena nyendiaka diri napi PRN ti dipelaba deka diatur dalam taun 2016 ila.
Ukai semina nya aja, pengawa muka opis baru nya mega ulih nyendiaka awak ngagai semua komponen parti BN di Engkilili ngambi ulih bejalaika atur pengawa kena napi PRN 2016 seraya ngemanahka kerejasama kena ngetanka penuduk BN di Engkilili,” pia ku iya.