Dikarang Rengenyan Labang
KUCHING: Perintah besai ti deka berundingka peminta nikika royalti minyak enggau gas ari 5 peratus ngagai 20 peratus, berita manah ke rayat Sarawak sereta patut diputus enggau naka pengelengkas.
Chairman Parti Pesaka Bumiputera Bersatu (PBB) N.1 Opar Datuk Peter Minus madah, penyampat tauka pengelengkas pemutus nya amat beguna ke rayat, dikena ngangkatka pemansang dalam perengka guna kelimpah ari pekara pelajar.
Ba penemu iya, Sarawak sebuah nengeri ti pemadu besai endang begunaka penyampau belanja ti mayuh dikena ngemansangka menua.
“Kitai ngarapka pemutus (nikika royalti minyak enggau gas ari 5 peratus ngagai 20 peratus) ulih diputuska enda lama agi, jampat agi lebih manah agi (ke kitai Sarawak).
“Kebuah pia laban Sarawak amat begunaka belanja dikena bejalaika mayuh pekara lebih agi dalam pengawa nyambung jalai alun mengeri enggau menua pesisir, nyendiaka bekal elekterik enggau bekal ai beresi, sekula, klinik sereta palan pemansang menua pesisir.
“Lebih agi peranak di menua pesisir amat begunaka bantu ti ulih ngangkatka pemanah pelajar, nyungkakka penatai pemisi, tikas pengerai sereta pengidup ti lebuh meruan. Semua nya begunaka belanja,” ku iya nengah sistem pesan pandak.
Menteri Besai Datuk Seri Najib Tun Razak lebuh bejaku sereta bejadika Rumah Terbuka Malaysia Gawai Dayak 2014 di Dataran Kipas di Miri apin lama madahka perintah besai deka berundingka enggau naka pemanah pasal peminta Sarawak ti deka ke royalti lebih tinggi bekaul enggau asil minyakl enggau gas ari nengeri tu.
Najib madahka perintah besai nadai penanggul berundingka enda ngira nama pekara bekaul peminta enggau guna nengeri Sarawak.
“Perintah besai deka berundingka enggau naka pemanah pasal pekara (peminta royalti lebih tinggi) tu.
Nambahka nya, Peter madahka Sarawak begunaka puku besai ba pengawa nyendiaka orang bepengelandik dikena nangkup peminta guna dalam industri lebih agi SCORE.
“Nya alai kitai amat begunaka mayuh belanja tauka duit dikena numbuhka palan pematih pengelandik awakka ulih nempa mayuh agi nembiak nengeri tu bepengelandiik lalu ulih nyeliahka ari bepanggai ngagai pengereja pengawa bepengelandik ari menua luar,” ku iya.
Kelimpah ari nya iya madahka rayat Sarawak ngelama tu seruran meri sukung ngagai iring perintah besai enda ngira sekalika pekara nya manah tauka enda.
Aku ngasaika tu enda tau enda nyadika tegal Menteri Besai mending sereta beratika peminta Sarawak enggau nadai bechiping, ku Peter.