PATUT DIPUTAR: Ting (dua kanan) enggau bala bukai maya datai ngabas jalai nya, empai lama tu tadi.
BINTANGOR: Bala ke diau semak enggau Jalai Kilang ditu lama udah betapi enggau penanggul ti bepun ari sumil ke bisi digaga dia, ti enda ngemeratka pemeresi ke tau bendar ngeruga pengelikun enggau pengerai sida.
Kaban Kunsil Nengeri (ADUN) Meradong Ting Tze Fui enggau bala komiti Parti Tindakan Demokratik (DAP) Pampang Bintangor bisi datai ngabas jalai nya pengudah ke nerima sebana ari mensia mayuh empai lama tu tadi.
“Taja pan bala ke diau semak ditu suah mantaika sebana sida ngagai opis ti bekaul, tang penanggul tu mengkang diasai nyentuk ke sehari tu.
“Jalai tu kelalu kamah, lutak ukai sehari tu aja tang kenyau beberapa taun ke udah,” pia ku iya madah ngagai pengarang berita.
Kelimpah diasai bala ke diau semak dia, bala nembiak ba sebuah sekula primari enda jauh ari nya mega bela ngasai penanggul ke sebaka.
Ting madah, ketegal penanggul tu, sida ke diau semak nya nambit pintu enggau penjan sida besesehari nangika abuk tama ke dalam rumah.
“Tang taja pia, rumah sida mengkang tama abuk ari sumil ke besemak,” ku iya madah baru.
Penanggul tu ku iya, tau endar ngeruga pengerai enggau pengelikun bala diau dia kelimpah ari nembiak ke belajar ba sekula primari ke semak nya.
Ku iya, penusah tu bepun ari chara sekeda ari sumil lebih agi iya ke semak enggau simpang Jalai Kilang, Lurung 5, ti enda ngemeratka pekara pemeresi, baka enda muai uras ba endur ti patut.
Berindik ari pekara nya, Ting minta opis ti bekaul ba pelilih nya ngemeratka agi pekara pengerai seraya ransing agi ngiga chara mutarka penanggul ti ditapi rayat dia.