KOTA SAMARAHAN: Ulah positif, regas, bebendar sereta ransing ati belajar enggau ngereja pengawa, patut dikemeran sereta dikemeratka seseiku nembiak universiti enti deka teulihka penyulut pelajar.
Mandal Canselor Universiti Malaysia Sarawak (UNIMAS) Prof Dato Dr. Mohamad Kadim Suaidi madah, bala nembiak patut bebendar agi sereta berakup enggau UNIMAS bejalaika tanggungpengawa kolektif dikena ngangkatka nama universiti ngambika ulih tejapaika kluster ti tinggi agi.
“Kami ngenataika pengaga ati ngagai semua 758 iku kita ari 8,256 iku ke minta, laban ti udah dipilih nampung pelajar ba UNIMAS, iya nya sebuah Universiti Komprehensif ke pemadu manah di menua tu.
“Berengkah ari diatu kami ngelalau semua ulah negatif, ulah ngudah sereta betangguh ngereja pengawa enggau ngelusu patut dibuai. Ulah nya enda patut dikemeranka enti deka ngulihka penyulut.
“Tang runding enggau ulah ti positif ulih mai penyulut tauka pemutus ti positif,” ku Kadim dalam teks jaku iya ti dibacha Sapit Mandal Timbalan Canselor (Akademik & Antarabansa) Prof Dr Fatimah Abang.
Fatimah ngarika Kadim bejadika Majlis Ikrar Pelajar Baharu (MIP) Minggu Aluan Pelajar (MAP) Pusat Pengajian Pra-Universiti (PPPU) Sesi 2014/2015 UNIMAS ti diatur ba DeTAR PUTRA, UNIMAS ditu, pagi kemari.
Ngenang MAP ti diatur UNIMAS, iya arapka bala nembiak ulih ngaul sereta bekelala enggau pangan diri, laban semua nembiak ke baru ngerejista diri nya datai ari mayuh bengkah pupu bansa, adat enggau main asal, ideologi, politik, tikas ekonomi enggau rama sereta datai ari nengeri ti bebida.
“Taja pan jaku sereta asal kita semua enda sebaka, tang anang enda ingat kitai semua agi ari baruh seiti perabung ti bekonsepka 1Malaysia.
“Arapka MAP tu nyadika pelasar ngagai bala nembiak nelebaka diri enggau pengidup universiti,” ku Kadim.
Nembiak ti kena pilih tu dikearapka ulih nyadi ejen pengubah sereta mai transformasyen positif ngagai UNIMAS, ku iya.
Ba pengerami MIP, semua nembiak besemaya nitihka Akta, Undang- Undang, Statut enggau atur Universiti sereta ngambi peluang ti bisi disediaka UNIMAS kelimpah ari nyaga pemanah nama universiti.
Sama bisi datai ba pengerami nya, bala Sapit Mandal Canselor, direktor, Dekan, ketuai pemesai universiti enggau nembiak kampus.